Allen dien, die disen gegenwúrtigen brief ansehent lesent oder ho^erent lesen, kúnd vnd vergih ich Gerwig || der Paier¹ burger ze sant Gallen, das ich den tail miner wise, da der stette graben vfwerf vfge||worfen ist, vnz an die marhstain, das des graben messe dem burgern nút gab, reht vnd redlich ze ko^vfen || geben han . . dem amman vnd . . dem rat ze sant Gallen an der stette stat vmb vier pfunt pfenning Costenzer múnse, die ich dar vmb von inen enphangen han vnd in minen offenbern nutz komen sint. Ich sol oder mine erben o^vch ald swer die wise hat den zun vnz an die marhstain zv´nen vnd friden fúr veh an der burger schaden. Ich entzih mich o^vch fúr mich vnd fúr alle mine erben an dem vorgenemten taile miner wise alles des rehtes, so ich dar an hette oder han mohte, vnd aller der ansprach vnd der helfe, so ich wider disem ko^vfe mo^ehte gehan von wetlichem^a) ald gaistlichem gerihte. Vnd das dis alles war sie vnd sta^et belibe, dar vmb gib ich disen brief besigelt mit minem insigel ze ainer meren sicherhait der vorgeschriben dinge. Das beschah ze sant Gallen vnd wart der brief geben, do man zalt von gottes gebúrte drúzehenhundert jar, dar nah in dem ain vnd drissegesten jare, an dem nehsten zinstag vor aller hailigen tag.

Source Fulltext: Chartularium Sangallense VI, Nr. 3469, S. 119.