Wir graue Kraft von Toggemburg, graf Friderich vnd graf Diethelm von Toggemburg¹ kv´nden || allen, die disen brief sehent oder ho^erent lesen, vnd veriehen offenlich, daz Dietrich vnd Wernher || von Batzemberg² gebrv^odere den hof ze Ingemmatten³, den si von vns ze lehen hatten vnd vierzehen mv´tte || kernen vnd zehen schilling pfenninge jerlich giltet, mit allem rechte, so dar zv^o geho^ert, ledeclich vfgeben hant an vnser hende, vnd hant sich ovch willeclich verzigen fúr sich vnd fúr ir erben aller rechtunge vorderunge vnd ansprache, die si nach dem vorgenanden houe ze Ingemmatte iemer dekeine wîse mo^echten gewinnen an geistlichem vnd an weltlichen gerichten. Vnd haben ovch wir alle drije vnuerscheidenlich den selben vorgenanden hof ze Ingemmatte nach dem male, do er vns ledeclich vfgeben wart, als vorgeschriben ist, durch got vnd durch vnser vordern vnd vnser selen heils willen mit allem rechte, so dar zv^o geho^ert, fúr ledig eigen geben den erwirdigen geistlichen mannen . . dem abte vnd dem convente des gotshuses ze Rúti⁴ des ordens von Premonstrey in Kostenzer bischton ze ir gotshuses wegen, vnd haben vns ovch verzigen vnd verzihen vns an disem brieve fúr vns vnd fúr vnser erben vnd nachkomen, die wir hie zv^o binden, aller rechtunge ansprache vnd vorderunge, die wir nach dem vorgenanden houe ze Ingemmatte iemer dekeine wîse mo^echten gewinnen an geistlichem vnd an weltlichem gerichte. Ovch haben wir globt alle drije vnuerscheidenlich vnd binden vnser erben dar zv^o, des vorgenanden houes ze Ingemmatte mit allem rechte friheit vnd der ehafti, so dar zv^o geho^ert, des abtes conventes vnd des gotshuses ze Rv´ti fúr ledig eigen wêren ze sinne nach rechte beide vor geistlichem vnd vor weltlichem gerichte vnd an allen stetten, swa oder swenne mans bedarf. Vnd hier v´ber ze einem wâren stêten vnd vesten vrkv´nde so haben wir alle drije disen brief mit vnsern insigeln besigelt offenlich. Dirre brief wart geben Zv´rich, an der nechsten mittewochen vor aller heiligen tult, do von Cristes gebúrte waren drúcehen hvndert jar vnd dar nach in dem ein vnd drissigosten jare, da ze gegen waren her Chv^onr. vnser capplan⁵, Friderich kilcherre ze Vtzna⁶, Wilh. kilcherre ze Watwile⁷, Heiniman a dem Wasen, Heinr. Kelner von Eiliggo^ei⁸, Lútolt von Liechtensteig⁹, Chůnr. Eichorn, Chv^onr. Grenseli vnd ander erber lúte.

Source Fulltext: Chartularium Sangallense VI, Nr. 3470, S. 119-120.