Wir Ludowig von gotes gnaden Romischer keyser ze allen ziten merer dez richs || veriehen offenlichen an disem brief, daz wir dem vesten manne Vlrichen von Kunigesecke¹ vnserm || lieben getriwen vnd sinen erben schuldig worden sin hundert marck silbers vmbe sin dienst, die || er vns tun sol. Vnd dar vmbe versetzen wir ime vnd haben versetzet div vogtey vber den hof ze Trogen², also daz er vnd sin erben si inne haben su^ellen vnd niezzen mit allen rehten, eren, nútzen, guten gewonhaiten, die durch reht da von geuallen sullen, vnd mit allem rehten, besucht vnd vnbesuht, als lange, biz wir oder vnser nahkomen an dem riche kůnig oder keyser div vorgenanten vogtay von ine erlo^esen vmbe die vorgenanten hundert marck silbers gentzlichen vnd gar, vnd wellen niht, daz si iemand dar an irre, bi vnsern hulden. Vnd dar vber ze einem vrchúnde geben wir in disen brief mit vnserm cheyserlichem insigel besigelten. Der geben ist ze Rauenspurg³, an dem phingst abent, da man zalt von Christes geburt driuzehen hundert iar, dar nah in dem zwai vnd dreizzigestim iar, in dem ahzehendem iar vnsers richs vnd in dem funften dez cheysertumes.

Source Fulltext: Chartularium Sangallense VI, Nr. 3495, S. 144-145.