Allen, die disen gegenwúrtigen brief ansehent ald ho^erent lesen, kúndin wir swester || Kathrin eptissen vnd gemainlich dú samenunge des klosters ze Veltbach¹ Grawes || ordens in Costenzer bistům, de wir von dem gůt vnd dem almůsen, so vns der er||ber man Wernher der Hunt² burger ze sant Gallen bi lebendem libe gab lutirlich dur got vnd dur siner sel willen, gaebint vnd geben soltint iemer me, die wile de closter stat, ein pfunt pfenninge Constenzer munse dem spital ze sant Gallen³ jêrgliches geltes⁴ ab den gu^etern ze Haerdern⁵ vnd ze Horwen⁶, won aber dc sel gerête vns swaere was vnd och inen vnkomlich, dar vmb so haint^a) die erberen gaisclichen vrowen swester Gepe vnd swester Kúnegunt von Meckingen⁷, die baide gewilet vrowen sint in vnserm closter ze Veltbach, das vorgenant pfunt geltes reht vnd redlich geko^vft haint^a) vmb sibenzehen pfunt pfenninge Constenzer von dem spital ze sant Gallen wider an vnsir gotzhus ze Veltbach, doch mit selchem gedinge, de die vorgenanden vrowen swester Gepe vnd swester Kúngunt von Meckingen ein pfunt geltes Constenzer munse habint vnd haben so^elint von dem closter ze Veltbach iaerglich, die wile sú baide ald ioch ir ain wedrú lebt, vnd nah ir baider tode so ist de pfunt geltes ledig vnserm clostir ân mêngliches ansprache, won es iro reht lipding ist. Ich swester Kêthrin eptissen ze Veltbach uergihe, de dis alles beschehen ist mit vnsirs herren des abtes von Salem⁸ wissend vnd gunst, vnd loben fúr mich vnd alle min nah komen, den zwain vorgenanden vrowan ze gebenn I. lb. Constenzer ze lipdinge ellú iar ze sant Gallen dult, vnd wenn man inens denn nit git, so sond sú dú vorgenanden gůt Haerdern vnd Horwen de iar innemen vnd niessen, vntz sú gewert werdent. Vnd zeinem waren vrkúnd, de es alles stêt belib, so gib ich inen disen brief mit vnserm insigel. Der wart geben nah gotz geburt drúzenhundert vnd drú vnd drissig iar an sant Bartlomes abent.

Source Fulltext: Chartularium Sangallense VI, Nr. 3525, S. 171.