Wir Ludowig von gots genaden Romischer keyser ze allen ziten merer des richs veriehen || offenlich an disem brief, daz wir den vesten mannen Liutolden vnd Chunr. brú|dern schenchen von Landegg¹ vnsern lieben getrewen schuldich worden sein vmbe || ir dinst, die si vns vnd dem riche getan habent, hundert march silbers. Vnd die selben hundert march silbers haben wir in geslagen auf den hof ze Scheftnawe², der gelegen ist in dem Turtal³ vnd der in vor phandes stat dreizzig march silbers von kunig Rudolfen vnserm aneherren vnd voruarn⁴. Also daz si den vorgenanten hof vnd swaz darzů gehoret, besuht vnd vnbesuht, inne haben sullen vnd niezzen vnd ir erben, als lang vntz wir oder vnser nachomen an dem riche chunig oder keyser den selben hof vmb die hundert march vnd vmb die dreizzig march silbers, die er in vor stat, von den vorgenanten schenchen von Landegg vnd iren erben erledigen vnd erlosen. Vnd dar vber ze vrchunde geben wir in disen brief versigelten mit vnserm insigel. Der geben ist ze Ezzlingen⁵ an dem vreytag vor Magni, da man zalt von Kristus geburt driutzehenhundert iar, darnach in dem dritten vnd dreizzigstem iar, in dem niwentzehenden iar vnsers richs vnd in dem sechsten des keysertums.

Source Fulltext: Chartularium Sangallense VI, Nr. 3526, S. 172.