Ich Birhtel burger ze Ma^emmingen¹ tůn kunt vnd vergih offenlich an disem brief allen, die in ansehent ald || ho^erent lesen, daz ich mit gůter betrahtung vnd mit rat miner frúnde den erberen herron . . dem abt vnd . . dem || conuent vnd dem gotzhus ze Ysni² reht vnd redlich ze koffend han geben den wiger in dem Boden³, der min lehen || waz von sant Gallen, vnd min wise, div bi dem selben wiger gelegen ist, dieich ze lehen hat von dem êrwirdigen herren grauen Hug von Bregentz⁴, vnd han in div selben zwai gůt baidú den wiger vnd die wise reht vnd redlich geben mit allen nútzen vnd rehten, die darzů geho^erent vnd geho^eren sont durch reht, vnd als ich vnd Johans Birhtel min brůder div selben zwai gůt besessen vnd genossen vnd herbraht hant v´ntz vf disen hútigen tag, vmb fúnfzig phunde phenning gůter vnd ga^eber Costentzer múnse, der ich gar vnd ga^entzlich gewert bin vnd in minen nutz komen vnd bewent sint, vnd sol ich Birhtel vnd min erben des vorgenanten gotzhus ze Ysni weren sin vmb div vorbenenten zwai gůt, als reht ist, vnd in div selben zwai gůt den wiger vnd die wise vertgun von den lehenherron, als reht ist, wenne si ez můtent vnd begerent, vnd nach der vertgung aber weren sin, als reht ist, wa^er aber, daz ich div vorgeschribenne gůt baidú den wiger vnd die wise von den lehenherron nit g[e]uertgun^a) mo^eht, als reht ist, so sol ich Birhtel vnd Johans Birhtel min brůder vnd vnser erben des vorgenanten gotzhus ze Ysni getrúwe trager sin vmbe den vorgenanten wiger vnd vmbe die wise ane alle geua^erde vntz vf den tag, daz si in gevertgot werdent, als reht ist, von den lehenherron. Vnd des ze ainem gewa^eren vrkúnde aller der vorgeschribenne dinge gib ich Birhtel der vorgenant von mir vnd minen erbon dem vorbenenten gotzhus ze Ysni disen brief besigelt mit minem aigem insigel vnd mit mines brůders insigel Johansen Birhtels. Ich Johans Birhtel pfleger sant Anthonien gotzhus ze Ma^emmingen⁵ durch bet Birhtels mines brůders vnd ze ainer warhait aller der vorgeschribenne dinge henk minen insigel an disen brief. Dirre brief wart geben an dem palm abent in dem jar, do man zalt von gottes geburt drúzehenhundert jar, darnach in dem vierunddrissgosten jar, ind. secunda.

Source Fulltext: Chartularium Sangallense VI, Nr. 3541, S. 183-184.