Wir Johans¹ etc. veriehen, daz wir^a) gemainschafft der ersamen purger der stat von sand Gallen in vnser sundern scherm^b), daz si vnd ire poten mit ir leib vnd mit ir gůt vnd mit aller irr chaufmanschaff vberal in vnsern herschaff vnd gepiet darin vnd dar durch vnd wider daraůz ze varen vnd darinne wonung ze haben in sulher fridsamichait, als weilent pei vnserm saeligen herren vnd vater, dem got genade, gearbaiten vnd gewandlen mugen, doch vns ze behalten den gewalt, die vorgen(anten) vnser genade, gelayt vnd sicherhait in wider ab ze sagen gen Pludeins² in die stat gelegen an dem Arel³ mit vnsern poten oder prefen, swenne wir wellen, vnd nicht furbaz, vnd danach, swenne wir in die vorgen(anten) vnser genad, gelait vnd sicherhait ab gesagen, von dem selben tag vnd wir in si abgesagen haben, sullent dannoch ze ainem gantzen manod an ir leib vnd an ir gůt volle vnser sicherhait gelait vnd schirm haben vnd nicht lenger, vnd gepieten daruber allen vnser vndertan, edlen vnd vnedlen, richtern vnd amptlau^eten, swie si genant sint, den diser prief geoffent oder gezaiget wir^c), dar^d) si die vorgen(anten) purgern von sand Gallen vnd ire poten an ir stat an den vorscriben vnsern genaden gelait vnd sicherhait vnu^eberuarenleich vnd an vnser stat schirmen fristen vnd behalten vnd des nich enlazzen vestichleich pei vnsern hulden.

Source Fulltext: Chartularium Sangallense VI, Nr. 3644, S. 250.