Allen den, die disen brief an sehent lesent oder ho^erent lesen, kúnt ich herr Amor von Luterberg¹ ritter vnd vergich || offenlich an disem brief fúr mich vnd fúr min erben, daz ich mit gůtem willen vnd mit gůter vorbetrah||tung gesunt minez libez die hůb ze Flawille², dú min reht lehen waz von der herschaft von der Alten Klingen³, || mit allen rehten gefu^eget vnd geben han den erwirdigen klosterfrowan . . der aptischennen vnd dem conuent gemainlich dez klosters ze Maggenowe⁴ durch got vnd miner sele hailez willen vnd miner vorderen selen v^s genônlich miner wirtennen Elsbethen sele vnd miner kint mit der gedingde, daz der vorgeschriben conuent min iarzit nach minem tod, miner vorgeschribenen . . wirtennen vnd miner vorbenempten kinden jarzit began sont mit singen vnd mit lesen, als ir sit vnd ir gůtú gewonhait ist. Ez ist och fúrbaz bedinget, daz [s]wester^a) Anna⁵ min elichú tohter die vorbeschribenen hůb han vnd niessen, besetzen vnd entzetzen sol^b) zend ir wil nach liptings reht, vnd wenne si erstirbet, so ist dú dikbenempt hůb dem vorbenempten kloster z[e]^a) Maggenowe gar vnd ga^entzlich ledig vnd mit allen rehten, als ich si han gehebt, geuallen, vnd enzihe mich dar v´ber fúr mich vnd fúr alle min erben vnd nahkomen gen der vorgenanten . . aptische[nn]e^a) vnd dem conuent ze Maggenowe vnd gen allen iren nahkomen aller ansprach aller vorderung allez schirmez allez v^fzugs^c) vnd allez rehtez gaistlichez vnd weltlichez gerihtez, da mit ich ald kain min erbe vnd nahkomen ald ieman andre von v´nsren wegen die vorgenanten hůb ko^endin ald mo^ehtin an gesprechen ald da mit wir wider disen vorgeschribenen dingen getůn mo^ehtin. Ich sol o^vch der vorgenanten hůb der vorgenanten . . frowan vnd ir nahkomen rehter wer sin nach reht ân geua^erd vnd ân allen iren schaden. Wa^er och, daz ich oder min erben, ob ich enwa^er, da wider, als da vor an disem brief geschriben stât, iemer v´t geta^etin, so enzihen wir v´ns allez dez rehten, da mit wir v´ns geschirmen mo^ehtin mit gaistlichem oder mit weltlichem geriht. Vnd hab diz allez getân vnd follefůrt mit allen den worten, werchen vnd geta^eten, so dar zů hort ald geho^eren mohte nach reht oder nach gewonhait dez landez. Vnd ze wârem vnd offen v´rkúnt vnd sta^eter vnd ewiger sicherhait allez dez, so hie an disem brief geschriben stât, gib ich der vorgenant her Amor von Luterberg ritter fúr mich vnd alle min erben vnd nachkomen der vorbenempten . . aptischennen vnd dem conuent ze Maggenowe vnd allen iren nachkomen dar v´ber disen brief mit minem aigen insigel besigelten. Der wart geben ze Maggen(owe), do man zalt von gotz gebúrt drúzehenhundert iâr,dar nach in dem sehs vnd drisgosten jâr, an sant Johans abent dez To^vfers.

Source Fulltext: Chartularium Sangallense VI, Nr. 3617, S. 227-228.