Omnibus Christi fidelibus presencium inspectoribus tam presentibus quam futuris Eglolffus dictus Blarer¹, Johannes dictus an dem Markt² provisores et V^olricus dictus Senn³ procurator hospitalis pauperum infirmorum infra muros oppidi sancti Galli noticiam subscriptorum. Quia ea, que in tempore geruntur, scriptis transmitti posteris consueverunt, ne labatur a memoria, quod rite et provide est per actum, ea, que dei nomine aguntur, tanto forcius solidari oportet, quanto gravius offenderetur deus, si negligencia vel desidia intermitti contingeret, quod maxima debebat sollertia perhennari. Ad universitatem seu universorum noticiam, quos nosse oportunum fuerit, cupimus devenire, quod cum discretus V^olr. Heinr. dictus O^eme ministerialis monasterii sancti Galli saluti anime sue salubriter desiderans providere intuitu remuneracionis divine prefato hospitali libere et absolute tradiderit curiam dictam Hůb sitam iuxta Capelle vnder dem Rodmonten, quam tenebat in feodum a monasterio sancti Galli, consencientibus venerabilibus dominis Hermanno dei et apostolice sedis gracia abbate totoque conventu monasterii sepedicti, sicut in instrumento desuper edito plenius continetur⁴, nos igitur considerantes et u intuentes pie devocionis affectum, quem prefatus Heinr. dictus O^eme in hac donacione et in multis aliis beneficiis exhibuit et inposterum exhibere predicto poterit hospitali, matura deliberacione prehabita volentes eidem gratam facere vicissitudinis recompensam prefatum hospitale obligavimus et ad infrascripta presentibus obligamus scilicet ad dandum annis singulis de curia prenotata, quam diu prefatus Heinr. supervixerit, in anniversario Katherine quondam sui uxoris legittime, qui contingit in vigilia omnium sanctorum, cuilibet sacerdotum capellas infrascriptas inofficiancium quinque denarios monete Const(anciensis). Cum autem prefatum Heinr. viam universe carnis ingredi contingerit, ex tunc inantea prefati hospitalis magister seu procurator, qui pro tempore fuerit, dare debet et tenetur singulis earundem capellarum sacerdotibus in anniversario suo, quocumque die evenerit, quinque denarios predicte monete perpetuo annuatim temporibus post futuris, et hospitale prenotatum eiusque procurator seu magister debet esse deinceps penitus et absolutus a dacione seu donacione predictorum quinque denariorum in anniversario Katherine prenominate, sacerdotes vero easdem inofficiantes capellas tenentur predictum anniversarium Katherine prefate ante obitum predicti Heinr. solummodo, sicut infra scriptum est, celebrare et anniversarium prenotati Heinr. post suum obitum perpetuo in suis ecclesiis seu capellis compulsacione debita et cum missa pro defunctis annis singulis solempniter revolvere et celebrare et interesse misse monasterii eo die et ibidem quilibet eorum unum debet offerre denarium, si interdictum vel alia causa racionabilis in huiusmodi non obsistat. Quicumque autem se a celebracione seu oblacione prescripta sponte absentaverit, sua tunc porcione carebit ac penitus sit privatus. Capelle, quarum sacerdotes predictorum denariorum sunt participes, hec existunt videlicet sancti Othmari⁵, sancti Oswaldi⁶, sancti Saluatoris⁷, capella sancti Galli⁸, sancti Petri⁹, sancti Sepulcri¹⁰, sancte Marie¹¹, sancti Johannis¹², sancti Laurencii¹³, ubi utrique sacerdoti dantur quinque denarii, capella hospitalis predicti, sancti Leonardi¹⁴, sancti Magni¹⁵, sancti Jacobi¹⁶, sancte Fidis¹⁷, sacerdoti vero capelle leprosorum am Linsibu^el¹⁸ debent dari duo solidi denariorum annuatim et predicti quinque denarii, si autem prefatos leprosos ad tantam contingeret devenire inopiam, quod deus avertat, quod non possent habere sacerdotem inibi residentem, predicti duo solidi denariorum annuatim debent leprosis tribui prelibatis. Annectimus eciam ordinacioni supra scripte ac hospitale sepefatum nosque et nostros successores, qui eiusdem hospitalis pro tempore fuerint procuratores aut provisores, eiusdem hospitalis nomine ad infra scripta servanda perpetuo presentibus obligamus videlicet ad dandum et ministrandum de sepedicta curia Hůb pro salute anime prenotati Heinr. dicti O^emen monasterio sancti Galli et omnibus ecclesiis et capellis prescriptis ac universaliter omnibus sacerdotibus religiosis et secularibus in eisdem monasterio et capellis divina misteria^a) celebrantibus maiores hostias bonas et habiles, prout unicuique ipsorum neccessarium fuerit ad conficiendum sacrosanctum eukaristie seu dominici corpore^b) sacramentum. Ut autem ordinaciones et instituciones prenotate integraliter firme et inviolabiles in suo robore perhenniter perseverent, promittimus bona fide et dictum hospitale astringimus ad ratihabicionem omnium premissorum eidemque hospitali potestatem omnimodam sepedictam curiam Hůbe vendendi distrahendi seu quocumque modo alienandi austulimus auferimus et abstulisse nos perpetualiter presentibus profitemur adhibitis in premissis omnibus sollempnitatibus verborum et gestuum tam debitis quam consuetis. Et in premissorum omnium et singulorum robur et perpetuam firmitatem nos prefati Eglolfus et Johannes sigilla nostra et sigillum hospitalis predicti prefato V^olrico consentiente duximus presentibus appendenda. Acta sunt hec in hospitali sepedicto sub anno domini M°CCC° VI°, in festo beati Leonhardi confessoris, ind. quinta.

Source Fulltext: Chartularium Sangallense VI, Nr. 3636, S. 2412-243.