Wir Georie von Wildenstein¹ vnd wir Albrecht von Zimbern² pro^ebste beide³ des gotzhvses von || sant Gallen tv^en kvnt allen den, die disen brief ansehent oder ho^erent lesen, das zv^o v´ns || kam der ergernde ritter her Heinrich vor Gassen von Basel⁴, den man nemet der Hagen||dorn, vnd bat v´ns vlissekliche vnd ernstliche, das wir lv´hen vron Gv^oten von Ramstein⁵ siner elichen fro^vwen die morgengabe vnd den widemen, die er ir beide gegeben vnd vsgerichtet het vnd o^vch gevertigot in dem dinghofe ze Egringen⁶ vor Johanse Werren, dem man sprichet Stecher von Friburg⁷, der an v´nser stat da richtet, vnd vor Jacobe Scherer von Bintzhein⁸, dem er vollen gewalt geben hatte an siner stat da zerichtende, als die hv^obere vnd sant Gallen lv´te vf iren eit erteilten, der bette erten wir in vnd volgeten ime des, wan es zimlich vnd mvgelich was zetv^onde vnd v´ns vnd dem gotzhvse von sant Gallen vnschedelichen, vnd lihen vriliche der selben vron Gv^oten von Ramstein die morgengabe also, das si jerglichs zwene kappen sol geben ze zinse in den dinghof ze Egringen von der selben morgengabe. Wir lihen ir o^vch friliche den widemen ze Egringen ze habende vnd zeniessende rv^owekliche, als man widemen billich han vnd messen sol, vnd sol si von dem selben widemen geben fv´nf schilling Baseler phenninge allv´ jar in den dinghof ze Egringen, die wile so si lebt, ze zinse, als o^vch an den briefen stat, die Johans Werre, den man nemet Stecher, dar v´ber besigelt het, ane alle geverde. Vnd ze einem offenen vrkv´nde vnd meren sicherheit, das dis war vnd stête belibe, dar vmbe so geben wir ir disen brief besigelt mit v´nser beider ingesigel. Dis geschach vnd wart dirre brief gegeben des jares, do man zalte von gottes gebv´rte drv´zehenhvndert jar, dar nach in dem sechsten vnd drissigosten jare, an sant Martins abende.

Source Fulltext: Chartularium Sangallense VI, Nr. 3638, S. 244-245.