In^b) gottes namen amen. Allen^c) den, die disen gêgenwartigen brief sehent oder ho^erent lesen, tůn ich Hiltebrant von Êmptz¹ von Werdenstain² ge||nant kunt vnd vergîhe offenlich, daz ich mit gůter betrâchtunge vnd râte miner gůter frv´nde ze ko^vffenne geben han vnd gib an disem brie||ue den gaistlichen lúten . . dem apt vnd dem conuent dez gotzhuses von Salmanswiler³ dez ordens von Zitêls Costentzer bistůmes min || gůt, daz da gelegen ist ze Jûkken⁴ zwischent dem dorfe Mvˆntigel⁵ vnd Diepoltzo^vwe⁶ vnd îetzunt an bûwent Kv^eni Zigerli vnd . . dv´ wittewe Hermannes sa^eligen wirtinne, mit holtze, mit velde, mit wasen, mit zwîge, mit wege, mit stege, mit wasser vnd mit wassers rv´nsen, besůchtes vnd vmbesůchtes, schinbers vnd verborgens, oder^d) der êrde oder vnder der erde, der Rin der hab es îetzo gewu^estet oder daz hernach ze nvˆtze mag komen, swie es genant ist, daz zv^o dem vorgeschribenem gůt îetzo ho^eret oder von alter het geho^ert, es lige dishalb Rins oder enhalb Rins⁷, vmbe sechs vnd drissig phunt Costentzer phenninge, die ich von inen enphangen han vnd in minen schinberen nvˆtz bekert han. Vnd gib inen daz selbe gůt ze ko^vffenne fv´r min recht lêhen von dem rîche. Vnd geloben vnd binde mich vnd min êrben, wer ze sîn nach recht des vorgenanten gůtes, swenne es die vorgnanten hêrren von Salmanswiler mv^otent an mich oder an min êrben oder si sin notdv´rftig sint. Vnd enzîhe mich vnd alle min êrben vnd nâchkomen alles des rechten, so ich han oder han mo^echt nv oder hernach an dem vorgenanten gůte oder den lúten, die dar vffe sîtzent oder ês bûwent von der vorgnanten herren wegen von Salmanswiler, ês sien fro^vwen oder man. Vnd geloben mit gůten trúwen fv´r mich vnd min erben, die êgnanten herren von Salmanswiler an den vorgeschribenen lv´ten vnd gůt nv´mber ze besweren noch ze mv^egenne mit kainer layge dinge. Vnd vergihe, daz ich daz êbenempt gůt han vf gen mit worten vnd mit werkken, als des landes gewônhet het, vnd kraft vnd macht mag han, vnd es enphangen hat brůder Hîltebrant der grôsze kelner von Salmanswiler an des vorgenanten gotzhuses stat, vnd daz ich in in nvˆtzelich gewêr han gesetzet des vorgenanten gůtes vnd swas dar zv^o ho^eret, vnd sêtze mit disem gêgenwartigen brieue ze habenne vnd ze niessenne in allem dem rechten, als ichs vnd min vordern vntz her haben genossen vnd gehebt. Diz dinges sint gezúge Walther vnd Chv^onrat die A^etten, Kv^eni vnd Hêrman Chv^onrattes des A^ettens sv´ne, Hainrich der Lo^elle, Chv^onrat der Bisschof, Kv^eni der Zîgerli, Chv^onrat, Herman, Hainrich vnd Johans sin sv´ne, Hainrich Arnsperg, Chv^onrat der Brûne vnd Chv^onrat Lútkilch zv´mberlúte vnd ander erba^er lúte genv^oge. Vnd daz diz alles wâre vnd sta^ete belibe vnd ze ainem waren vrkv´nde aller der vorgeschribenen dinge so gib ich den êgnanten hêrron von Salmanswiler disen brief besigelt mit minem aigen ingesigel vnd mit Eberhartes des Helwers miner basvn sv^ns ingesigel, dv´ dar an hangunt. Ich Eberhart der Helwer der vorgnant vergihe o^vch an disem brieue, daz ich min ingesigel durch bet des êgnanten Hiltebrandes mins o^ehams an disen brief han gehenkket ze ainem waren vrkv´nde aller der vorgeschribener dinge. Diz beschach ze den Jûkken vffe dem gůt, vnd wart aber dirre brief geben ze Salmanswiler vnd der ko^vf vollebrâcht vnd verendot, do man zalt von Cristes gebúrt drv´zehenhvndert jare vnd dar nach in dem sechs vnd drissigostem jar, an dem na^echsten samestage nach sant Michêls dult ze herbest.

Source Fulltext: Chartularium Sangallense VI, Nr. 3631, S. 237-238.