Venerabili fratri . . episcopo Constantiensi¹ salutem. Intenta salutis operibus apostolice sedis benignitas nonnumquam rigorem iusticie mansuetudine temperans, quod negat iuris severitas de gratia benignitatis indulget presertim inter personas nobilitate generis preditas et ecclesie Romane devotas, prout causa racionabilis id exposcit. Sane pro parte nobilis viri Friderici comitis de Toggenburg² et nobilis mulieris Conigundis nate dilecti filii nobilis viri Donati domini de Fatz³ tue Constantiensis^a) et Curiensis diocesum nobis fuit^b) expositum, quod ipsi comes et Conigundis scientes se ex muliebri^c) linea ab eadem stipite descendisse et in quarto consanguinitatis gradu ex dicta linea invicem se contingere, nichilominus tamen ad sedandum^d) graves discordias et gueras^e), que inter dictos comitem et Donatum ac eorum communes^f) consanguineos et amicos iam octo annis faciente pacis emulo viguerunt, ex quibus incendia depopulaciones locorum et alia multa personarum et rerum ac animarum pericula provenerunt, necnon pro bono statu et tranquillitate illius patrie ac deffencione^g) terre et hereditatis dicti Donati, qui sicut asserit non habet masculos filios, de communi tractatu consanguineorum et amicorum predictorum matrimonium per verba de presenti invicem contraxerunt, sed quia huiusmodi matrimonium absque dispensacione dicte sedis nequit licite consumari, pro parte ipsorum Friderici comitis et Conigundis extitit nobis humiliter supplicatum, quod cum maiora scandala et pericula inter comitem nobilem et amicos et consanguineos predictos formidentur verisimiliter suboriri, nisi matrimonium huiusmodi consumetur, quibus necnon^h) guerris et discordiis, que iam triginta annis ut asseritur in diocesi Curiensi fuerunt, speraturⁱ⁾ firmiter per consumacionem huiusmodi matrimonii obviari, providere ipsis super hiis de oportune absolucionis beneficio ac dispensacione legitima misericorditer dignaremur. Nos igitur, qui salutem querimus singulorum et libenter Christi fidelibus quietis et pacis commoda procuramus, huiusmodi scandalis et periculis ac guerris et discordiis obviare prout secundum deum possumus intendentes, huiusmodi supplicacionibus inclinati fraternitati tue, de cuius circumspeccionis industria plenam obtinemus in domino fiduciam, per apostolica scripta commitimus^k) et mandamus, quatenus si est ita et tibi expediens videatur, quod dicta concedatur dispensacio, super quibus tuam consienciam^l) oneramus, auctoritate nostra ipsis comite et Conigundi separatis ad tempus, de quo tibi videbitur expediens^m), ipsos a sentencia excommunicacionis, quam propter premissa incurrisse noscuntur, iuxta ecclesie formam absolvas, iniunctis eis inter alia sub virtute iuramenti prestandi, quod similia de cetero non comittant nec facientibus prestent consilium auxilium vel favorem, ac condigna salutari penitencia et aliis, que de iure fuerint iniungenda, et demum cum eisdem comite et Conigundi, ut impedimento huiusmodi non obstante matrimonium de novo contrahere et in eo, postquam contractum fuerit, licite remanere valeant, eadem auctoritate dispenses, prolem suscipiendam ex huiusmodiⁿ⁾ matrimonio legitimam decernendo. Datum Auinione, V. non. octobr. anno secundo.

Source Fulltext: Chartularium Sangallense VI, Nr. 3630, S. 235-236.