Wir swester Anna eptischenne vnd^a) der convent gemeinlich des closters ze Maggenow¹ || veriehen vnd tu^egen kvnd allen, die disen brief ansehent oder hôrent lesen, das wir || einwellclich mit bedachtem můte den erberen lúten Mechthilten Johans seligen des || Vrien von Eschlincon² elicher wirtennen vnd iren sv´nen V^olrich vnd Cv^onr. v´nsern halben hof heizet der kelnhof ze Eschlincon verlihen haben vmb so vil zinses, als in der vorgenant Johans selig hatte, vnd ist gedinget, dc die vorgenanten V^olr. vnd Cv^onr. enkeinen weg ze der ee wibon súln wan vnder des vorgenanten conventes lúten nach der vorgenanten vrowen rate vnd niena anderswa, vnd were, dc ir dewedere oder beide des verge^assin vnd anderswa ze der ee wibotin, so súln sú mit namen von dem hof sin vnd sol ietwedere darzů geben dem vorgenanten convent vúnf phvnt pfenning Kostentzer. Were och, dc nút wan ir eine des verge^assi, der sol och mit namen von dem hof sin vnd sol darzů dem vorgenanten convente vúnf phvnt Kostentzer pfenning geben. Es ist och gedinget, were dc dú vorgenant Mechthilt sich verenderti vnd ze der ee ke^ami, so sol si mit namen von dem hof sin vnd sol damitte nút fúrbas ze schaffenne han. Es ist o^vch gedinget vmb des vorgenanten Johans seligen tochteran Annen vnd Adelheiden, dc man die mit namen beraten sol vnder des vorgenanten conventes lúten nach miner vrowen rate, vnd were, dc daz ieman verge^assi, dc ir dewederú anderswa beraten wurde, dú sol mit namen dem vorgenanten convent geben vúnf phvnt Kostentzer pfenning, wurdin aber sú beide anderswa beraten, so sol ietwederú geben dem vorgenanten convent vúnf phvnt Kostentzer. Es ist och gedinget, were dc^b) der vorgenanten knaben V^olr. vnd Cv^onr. dewedere ab sturbe ane liperben, so sol der lebende den vorgenanten hof mit allem recht ze lehen han in allem recht, als ob sú beide leptin. Es ist och gedinget, were dc die vorgenanten knaben V^olr. vnd Cv^onr. beide ab sturbin ane liperben, so sol man die vorgenanten tochteran, ob sú vnberaten sint, vf den vorgenanten hof beraten vnder des vorgenanten conventes lúten nach v´nserr der vorgenanten vrowen rate vnd súln denne den selben hof han in allem rechte, als in die knaben hatten. Wa^er^c) o^vch, daz die dikbenempten knaben V^olr. vnd Cůnr., ir erbin alder ir nahkomen dem vorbenempten kelnholf^d) vnnútz wurdin alder in in gůtem buwe vnd in gůten eren nit hettin vnd och den gewonnenen zins ze rehten ziten nit ga^ebin, so sol der ebenemt hof dem dikbenempten conuent ledig sin^c). Vnd vmb dú vorgenanten te^ageding vnd gedinge ellú sament ze volfu^erenne, des sint v´nser des vorgenanten conventes recht tro^esterre vnd wern Heinr. vnd Cv^onr. Vrien von Eschlincon burger ze Wintertur³, vnd hand v´ns darzů ze búrgen gegeben die erberen lúte Joh(ans)en Gu^etinghûsen vnd Růd. Bering burger ze Wintertur. Die sint mit inen haft, dú vorgenanten tegeding ze volfu^erenne in allem recht, als vorgesriben ist. Vnd sint disú tegeding vnd disú gedinge beschehen mit aller giwarsami vnd mit allem rechte worte vnd werche, so ze solichen tegedingen nach recht vnd nach gewonheit hôret vnd man tůn sol. Vnd das dis war sie vnd ste^at belibe, darvmb besigellen wir dur ir bette disen brief mit vnserm insigel ze einem geweren vrkvnd aller der vorgesribenen dinge. Dirr brief wart geben ze Wintertur ze ingendem aberellen, do man zalte von gotes gebúrte drúzechenhvndert jar, darnach in dem achtoden vnd drissigosten jare.

Source Fulltext: Chartularium Sangallense VI, Nr. 3683, S. 276-277.