Allen, die disen brief ansehent oder hôrent lesen, kv´nd ich Johans Balber burger ze Wintertur¹, || das ich ze gerichte saz ze Wintertur an offenem marchte an Johans stat von Sala schultheizen² || ze Wintertur, vnd kamen da fúr mich die erberen lúte her Peter von Enmerrach³ priester, Cv^onr. || sin brůder vnd Margareth ir swester vnd offenoten vnd veriahen da mit fúrsprechen, sú hettin . . den lieben vrowen in gotte . . der abtischennen vnd dem convent ze Maggenow⁴ ir schůpoz lit ze Rorbos⁵, ane den wingarten, der vss der selben schůpoz genomen ist, heizet des We^achters wingarte, ze ko^vffenne gegeben vmb núndhalb march gůtes silbers Wintertur gewicht, des selben silbers sú von inen gantzlich gewert sint, des sú veriahen offenlich an dem gerichte, vnd heizet dú selb schůpoz des We^achters schůpoz vnd ist zinseigen an sant Petern gen Emmerrach⁶ vmb zwene pfening, vnd giltet jerglich ze zinse zwene mútt kernen, ein malter habern Zúrich mess, zwei herpsthv^enr, ein vasnacht hv^on vnd drissig eier. Sú baten inen o^vch ervarn an einer vrteild, wie sú dem selben convent die selben schůpoz vertegon vnd vf geben soltin, das es kraft hetti. Da fragte ich vrteild vmb, do wart erteilt mit gesamnoter vrteild, dc der vorgenant her Peter vnd Margar. sin swester die vorgenanten schůpoz vf geben vnd vertegon soltin mit ir vogtes hand vnd mit miner hand mit gelerten worten. Da fragte ich aber, wer dur recht ir vogt were. Do wart erteilt mit gesamnoter vrteild, dc der vorgenant Cv^onr. ir brůder dur recht ir vogt were, sid er ir nehste vatter mâg were, vnd sú o^vch die selben schůpoz mit des hand vertegon soltin, vnd der selb Cv^onr. mit siner hand, als vorgesriben ist. Das tâten sú vnd gaben vf die vorgenanten schůpoz vnd enzigen sich ir mit des vorgenanten Cv^onr. ir vogtes hand vnd mit miner des vorgenanten richters hand vnd der selb Cv^onr. mit sin selbes hand, als inen mit vrteild erteilt wart, an brůder Walthers hand von Maggenow ze des vorgenanten conventes handen mit akkern mit wisan mit holtze mit velde vnd mit allem rechte, so darzů gehôret, ane den vorgenanten wingarten, der vss der selben schůpoz genomen ist, den hand sú inen selben behalten, vnd lopten o^vch der selben schůpoz fúr ein zinseigen wern ze sînne nach rechte. Do daz beschach, da fragte ich vrteild vmb, ob dc beschehen were, als recht were. Do wart erteilt mit gesamnoter vrteild, das es wol kraft hetti vnd beschehen were, als recht were. Vnd ist dirr ko^vff vnd disú vertegvng beschehen vor gerichte mit vrteild mit aller gewarsami vnd mit allem^b) recht wort vnd werche, so ze solichem ko^vff vnd vertegvnge nach recht vnd nach gewonheit hôret vnd man tůn sol. Vnd dc dis war sie vnd ste^at belibe, darvmbe gib ich der vorgenant Johans von Sala von des gerichtes wegen dem vorgenanten convent disen brief besigelt mit minem insigel, als mir mit vrteild erteilt wart, ze einem geweren vrkv´nde. Dirr brief wart geben ze Wintertur ze mittem mertzen, do man zalte von gotes gebúrte drúzehenhvndert jar, darnach in dem achtoden vnd drissigesten jare.

Source Fulltext: Chartularium Sangallense VI, Nr. 3682, S. 275-276.