Wir graf V^olr.¹ vnd graf Hůg von Monfort² veriechen offenlich an disem briefe vor allen dien, die in ansechent lesen ho^erent || oder lesent, daz wir mit gůter vorbetractunge vnd wiser lute vnd frunde rat vnd wssent^a) hern Johans von Halwil³ vnser herren der herzogen || von O^esterrich vogt vmb alle sto^ez misshellung vnd krieg, die wir hattent vnd gehept haint gegen vnsern lieben vettern grafen Albrecht || von Werdenperch⁴ vnd sinem sun grafen Albrecht⁵, grauen Hartman⁶ vnd grafen Růdolf von Werdenperch⁷ gebrůdern vnd vnserm o^eheim grafen Friderich von To^vggenburg⁸ lieplich vnd gu^etlich bericht sigen vnd ain lûterlich ga^vnz getruwe sůn gu^en in vf han genon vnd gegen allen irn helfern vnd diener vnd sunderlich vmb den krieg, den wir hain gehept mit vnsern vettern vnd o^ehein grafen Růdolf⁷ vnd grafen Friderich⁸ von dez von Fatz seligen⁹ wegen. Wir graf V^olr. veriechent o^vch, dz wir die burg Fadútz¹⁰, lút vnd gůter, du vogt V^olr. von Ma^etsch¹¹ versetzet wrden ze der selben vesti, sullent han ze ainem lipdinge vnz an vnsern tot, vnd wenne wir nit sigen, so sol du selb vesti Vadútz, lút vnd gůt ledig sin vnd geuallen vnsern vettern graf Hartman vnd graf Růdolf gebrůdern vnd sont o^vch nit mit dem wingarten ze Fadútz me ze tůn han, vnd veriechen o^vch, sven^b) wir vf die vesti Vadútz setzin ze búrgman oder ze hu^etern vf der vesti, die sont swerren ainen ait zů dien hailigen, wen wir ensigen vnd tot sien, dz die dan die vesti in a^entwrdtin vnuerzogenlichen dien vorgenanten minen . . vettern grafen Hartman vnd grafen Růdolf gebrůdern vnd ir erben, ob si enweren, vnd als dik wir den burgman vnd die hu^eter geanderrt hain, die wir dan dar setzen, die sullen o^vch des selben swerren. Wir graf V^olr. sullen o^vch vnserm o^ehein graf Friderich von Toggeburch die burg^c) Wineg¹² ina^entwrdten vnd vnuerzogenlich wider gen. Ez ist o^vch geredd vnd haben vns selber dz behalten, werr dz wir von der buntnúst wegen vnd wir mit dien steten hain, die . . Maiier von Alsteten¹³ mu^esen angrifen mit krieg, vf die sollen wir beholfen sin mit der beschaidenhait, dz wir ez innen vorsagen sont. Ez ist o^vch mit worten beschaiden, werr dz vnsern vettern graf Albrechten vnd sin sún, graf Hartman vnd graf Růdolf vnd vnser^d) o^ehein graf Friderich, ir helfer vnd diener dehain ansprache hettin an vns vnd die vnsern von redelicher gúlte oder ander redelicher sache wegen, die disen krieg nit beru^erent, die sullen wir lieplich vnd recht vz tragen an geuerrde. Ez sullen o^vch all geuangen, die in disem krieg geuangen sint, den wir gehept han nú ze mal mit v´nsern vettern vnd o^ehein die vorgenanten, dar vmb wir nú ze mal ain sůn vnd richtung vf genomen hant, ledig sin, si sin in vnser geuanknust vnd burgschaft, vnd a^elle gedinge von dis kriegz wegen sont ab sin an geuerde. Wir graf Hůg von Monfort der vorgenante vnd graf Růdolf¹⁴ gebrůder veriechen o^vch, dz wir vnsern lieben vettern grafen Hartman vnd grafen Růdolfen von Werdenperch nach dem, so vnser vetter graf V^olr. gestorben ist, nicht irren noch bekre^vnchen sun an allen dien tedtinggen vnd er mit in getan hat vnd verschriben an disem brief vnd sunderlich an der vesti Vadútz, lut vnd gu^eter, dú dar zů ho^erent, des haben wir gesworn iedweder bisunder ain ait zů den hailigen mit gelerten worten ze tu^enne, dar^e) vmb wir die vorbenemten^f) graf Hůg vnd graf Růdolf von Monfort gebrůder vnser aigen insigel geben an disen offennen brief ze vrkunde dir vorgeschriben dingen. Wir graf V^olr. vorbene^vmter von Monfort hain o^vch vnser aigen insigel geben vnd gehu^enket^a) an disen brief ze ainer waren vrkunde aller der dingen vnd gedinge, so hie vor an disem offennen brief geschriben stant. Der geben wart ze Bender¹⁵, an sant Niclaus tag, do man von Cristes geburte zalte^g) drúzehen hundert jar vnd drisseg jar, dar nach in dem achtoden jare.

Source Fulltext: Chartularium Sangallense VI, Nr. 3698, S. 287-288.