Ich graue Johans von Habspurg¹ kúnden allen den, die disen brief sehent oder ho^erent lesen, daz Adelheit Ekelina fúr mich || kâm mit wolbedachter betrachtung vnd gab do mit minen gůten willen vnd gûnst ir zehenden, den si het hâr brâcht || von ir vater ein erbswis, dez ein teil gelegen ist ze Wagen² vnd ze Jonûn³ in dem kilchspêl vnd o^vch lehen ist von miner || hant, vnd gab den an daz gotzhus ze Jonun mit disem gedinge vnd mit dir ordenûng, daz si den selben zehenden sol niessen vndz an ir tôt, vnd ze einer behúgnust so git si o^ellú iar ein hůn dem kilchherren ze Jonun an sant Martis abunt, vnd swen dú vorgenând Adelheit erstirbet, so ist der egenând zehende geuallun der kilchen ze Jonun, also daz ein kilchherre, der ze dien ziten kilchherre ist ze Jonun, o^ellú iar sol geben dur der vorgenând Adelheit sele wille vnd ir fordrûn ein ewig liecht, daz brúnen sol in der vorgenanden kilchen tâg vnd nâcht, vnd o^ellú iâr ein mút kernen ze einer spende vnd o^ellú iar ein mút kernen in den spital⁴ den dúrftigen vnd o^vch o^ellú iar ein mút kernen an die Flůw⁵ dien velt siechen vnd her Jacob von Hûntzicon⁶ ein mút kernen, die wil er lebt. O^vch sol man w|ssen, daz ein kilcherre von Jonun lo^esen mâg die zwei stuki, daz stuki an den spital vnd daz stuki an der Flůw, ie wederz vmb fúnf pfunt phemningen^a) Zúricher geber múnze an die kilchen ze Jonun an eis kilcherren nûtz. O^vch sol mân w|ssen, daz dú vorgenande Adelheit den egenand zehenden vf gab an min hânt, vnd do daz beschâch, do lêhe ich den vorgenande zehende her Chůnrat Banwârt, der ze dien ziten kilcherre wâs ze Jonun, o^vch lêhe der egenand her Chůnrat den egenand zehende der egenând Adelheiden ze nîessende vndz an ir tôt. Vnd daz diz alles wâr vnd stête belibe nû vnd hâr nâch, so gib ich dur ir bête willen min ingesigel an disen brief ze einem gewârn vrkúnde der vorgescriben dingen. Diz geschach vnd wârt dir brief geben, do man zalt von gottez gebúrt drúzehen hundert jar, dar nach in dem núnden vnd drisigosten iar, ân dem zistag in der osterwchen, do ze gegen waren her Růdolf Trûgsezzo⁷ ritter, V^ol. von Russicon⁸, Heinrice Gamlenstein, Andrês Snepho, Arnolt Amman, Růd. von Brunnen vnd ander erber lúte.

Source Fulltext: Chartularium Sangallense VI, Nr. 3710, S. 297.