Wir graf Albreht von Werdenberg der elter¹ kv´ndin vnd vergehin offenlich allen, die disen gegenwúrtigen brief ansehent alder ho^erent lesen, das wir willeclich vnd mit gůter vorbe||trahtvnge durch das, daz wir meren schaden versa^ehin, der v´ns kv´nftig was, v´nserm lieben o^ehamen grauen Ffriderichen von Toggenburg² v´nser burg ze Rúdberg³, vnsern hof ze Rengen||swille⁴, die vogtye ze sant Peterszelle⁵ vnd ime Walde⁶, die v´nser aigen sint, vnd den hof ze Bútziswille⁷, der v´nser pfant ist von dem gotzhus ze sant Gallen, vnd die vogtye des selben houes, dv´ || v´nser lehen ist von dem riche, mit lúten vnd gu^etern, mit holtz, mit velde, mit wunne, mit waide, mit stegen, mit wegen, mit wasser, mit wasserrv´nsen, mit ehafti, mit gewaltsami, mit allen nv´tzen vnd gewonhaiten vnd mit allen rehten, gesůchs vnd vngesůchs^a), wissendes ald vnwissendes, benentes ald vnbenentz, vnd gemainlich mit allem dem, so zů den vorgenanten burg, lv´t vnd gu^eter ho^eret, reht vnd redelich versetzet habin mit v´nser hant zainem rehten werenden pfand vmb zwelf hvndert pfvnt Pfenning Costentzer mv´ns, vnd setzen im och die selben burg, lút vnd gu^eter an disem brief mit aller êhafti, worten vnd werken, so darzů ho^eret, also das er oder sin erben, ob er enwere, dv´ vorgenanten burg, lv´te vnd gu^eter haben niessen vnd besitzen so^elint als ir aigen gůt alle die wile, so wir oder v´nser erben die selben burg, lút vnd gu^eter von dem selben graue Friderichen oder von sinen erben nit gar vnd ga^entzlich erlo^eset haben vmb zwelf hvndert pfvnt pfenning Costentzer mv´ns, vnd vergehin offenlich an disem brief, das wir von dem selben graf Ffriderichen von Toggenburg zwelf hvndert pfvnt pfenning Costentzer mv´ns enpfangen habin vnd das sv´ in v´nsern gůten nvˆtz komen sint, vnd wenne wir ald v´nser erben, ob wir enwerin, dv´ vorgenanten burg, lut vnd gu^eter von dem vorgenanten grauen Ffriderichen oder von sinen erben, ob er enwere, wider lo^esen went, so so^elin wir zwelf hvndert pfvnt pfenning Costentzer mv´ns legen vnd antwúrten gar vnd ga^entzlich in ain offen mv´ns ze Costentz oder ze sant Gallen ald ze Zúrich oder in des rates gewalt der selben stet ainer oder anderswa, als wir vnd graf Ffriderich vorgenante oder v´nser baider erben v´berain koment, vnd wenne wir der vorgenante graf Albreht oder v´nser erben zwelf hvndert pfvnt pfenning Costentzer mv´ns legent vnd antwúrtent an ain sicher stat, nach dem als vor beschaiden ist, so so^elin wir es dem vorgenanten graf Friderichen kvnt tůn ald sinen erben, ob er enwere, vnd in ald sin erben manen vnd haissen, das er ald sin erben, ob er nit ist, dv´ vorgenanten zwelf hvndert pfvnt Costentzer pfenning da nement vnd enpfahen, ob sv´ ir da gewaltig sint ze enpfahent vnd ze nement, wan si das vorgenante gůt niendert anderswa gebvnden sint ze nement noch ze enpfahent, wan an ainer sicher stat, als vor beschaiden ist, vnd wenne er oder sin erben von v´ns vnd v´nseren erben, ob wir enwerin, der vorgenanten zwelf hvndert pfvnt Costentzer pfenning gar vnd ga^entzlich gewert werdent, so sol er oder sin erben v´ns die vorgenanten burg, lv´te vnd gu^eter mit allein reht wider antwúrten ane allen fúrzûg. Och haben wir graf Albreht vorgenante der elter gelobt fúr v´ns vnd v´nser erben, dem êgenanten graf Ffriderichen von Toggenburg vnd sinen erben wêr ze sinde nach reht der vorgenanten burg, lút vnd gu^eter, si sien v´nser aigen, pfant oder lehen, wa vnd wenne mans bedarf, an gaischelichem vnd an weltlichem gericht fv´r sin reht pfant vmb dv´ vorgeschriben zwelf hvndert pfvnt Costentzer pfenning, die er v´ns dar vff verlihen hat, vnd verzihen v´ns och dar v´ber fúr v´ns vnd v´nser erben gegen dem vorgenanten grauen Ffriderichen von Toggenburg vnd gen sinen erben aller ansprach, aller vordervng, alls schirms, aller vszúgen vnd gemainlich alles rehtes gaischelichs vnd weltlichs, da mit dv´ vorgenante pfandvng iemer dekainen weg bekrenket mo^ehte werden an gaischelichem oder an weltlichem^b) geriht oder ane geriht ald mit kainer slaht ander sache, vnd svnderlich verzihen wir v´ns fúr vns vnd v´nser erben aller widervordervnge der nv´tz, die er oder sin erben niessen mv´gen von den vorgenanten burg, lv´te vnd gv^eter, a^elle die wile die selben burg, lv´t vnd gu^eter von v´ns oder von v´nseren erben von dem vorgenanten graf Ffriderichen oder von sinen^c) erben nit wider erlo^eset sint gar vnd ga^entzlich vmb zwelf hvndert pfvnt pfenning Costentzer mv´ns. Vnd ze warem vnd offenne vrkv´nde vnd sta^eter sicherhait alles des, so da vor geschriben stat, geben wir graf Albreht von Werdenberg der vorgenant fúr v´ns vnd v´nser erben dem vorgenanten graf Friderichen von Toggenburg vnd sinen erben dar v´ber disen brief besigelten mit v´nserm insigel offenlich. Dis beschach vnd ist dirre brief ze Costentz geben, do man von Cristes gebúrte zalte drúzehenhvndert jare, dar nach in dem vierzigosten jare, an dem nehsten ma^entag vor v´nser vrôwen tag ze der liehtmisse, da ze gegen wârent her V^olrich von Clingen⁸, her Eberhart von Búrgelon⁹ fryen, her Egelolf von Roschach der elter¹⁰, her Amvˆr von Luterberg¹¹, her Egelolf der Ôme¹² ritter vnd ander erber lút gnůg her zů geru^eft vnd svnderlich gebetten.

Source Fulltext: Chartularium Sangallense VI, Nr. 3735, S. 311-313.