Allen, die disen brief ansehent alder ho^errent lesen, kúnden wir . . die ra^et vnd die burger gemainlich der stat ze Costentz || vnd veriehent offenlich an disem brief, das wir vmb alle sto^esse krieg vnd misshellung, die wir vntz vf disen húttigen || tag, als dirre brief geben ist, gehebt habint mit Walthern dem Maijer von Altstetten¹, lieplich vnd gu^etlich verainet || vnd verrihtet sigint mit der beschaidenhait vnd gedingen, als hie nach an disem brief gescriben stat. Des ersten, das wir vmb alle getât vnd schaden, so er v´ns vnd v´nseren burgern getan het ald von sinen wegen beschehen ist, luter frúnd worden sigint vnd das niemer geanden noch gea^eueron so^elint mit worten noch mit werken noch mit kainen sachen. Wir so^elint im och gunnen vnd gunnent im, das er zů sinen eren^a) vnd zů sim gůt kome mit buw vnd mit andren dingen, als im nutzlich sie, vnd das er vnd sin erben die burg ze Altstetten wider buwen sont, ob si went oder mugent, vnd v´ns damit warten, als der brief sait, den wir von^b) im habint². Wir veriehent och an disem brief, das wir aller der, die vf der burg ze Altstetten wider v´ns warent, vnd darnach aller der, die im in dem krieg zůlaitent vnd beholffen warent, luter frúnd von der getat wegen worden sigint mit der beschaidenhait, ob si in diser sůn vnd rihtung och sin went. Wa^er aber, das dero kainer, die im in dem krieg zůlaitent vnd beholffen warent, in diser sůn vnd rihtung nit sin woltint, das sol er v´ns lassen wissen ane alle geua^erd, vnd wele^c) danne dero, die hinder dem krieg von sinen wegen warent, in diser sůn vnd rihtung nit sin went, gen den sol v´ns disú rihtung vnd diser brief nit binden. Wa^er och, das dero kainer, die von v´nseren wegen hinder dem krieg gewesen sint, in diser sůn vnd rihtung nit sin woltint, das so^elin wir in och lassen wissen ane alle geua^erde. Vnd des ze vrkúnd etc. Geben in dem jar, do man von Cristes gebúrt zalt drúzehen hundert jar vnd in dem ain vnd vierzigosten jar, an dem na^echsten cinstag vor v´nser frowen tult ze der liehtmiss.

Source Fulltext: Chartularium Sangallense VI, Nr. 3766, S. 343-344.