Allen^a), die disen brief sehent oder ho^erent lesen, kúnden wir Hug, Sigfrid vnd Johans Tunben¹, das wir offenlich ze den || heiligen gesworn haben ein gelerten eit, das wir vnd v´nser erben, es sin sún oder tochteren, dem edlen herren grauen Fridrich || von Toggenburg² vnd fron Kúngund von Vatz³ siner elichen husfrowen vnd ir gemeinen kinden vnd der erbon, die sú ietz || hant oder noch sament gewúnnent, warten súlen vnuerscheidenlich gegen menlich wan allein wider grauen V^olrich, grauen Hug vnd grauen Růdolf von Montfort⁴ vnd ir erben mit v´nser vesti Tagstein⁵, die wir haben ze rechtem burglehen von den vorgenanden v´nserm herren von Toggenburg vnd v´nser frowen von Vatz siner elichen husfrowen^b), vnd o^vch v´nser erben, es sin sún oder tochtren, in burglehens wise, wer o^vch, das der vorgenant v´nser herre von Toggenburg oder v´nser frowe von Vatz sin elich husfrowe oder ir erben eigen kriege hettin mit den vorgenanden drin grauen oder mit keim vnder im^c) ald ir erbon, so sun wir mit der vorgenanden vesti Tagstein stille sitzen vnd enwederem teil mit der selben vesti behulfen sin, wir mugen aber mit v´nseren liben vsserent der vorgenanden vesti dienen, wem wir wellen, wir sun aber vsser der vorgenanden vesti noch in die selben vesti niemer nút getůn mit worten noch mit werchen, das den vorgenanden v´nsren herren vnd frowen ald ir erbon, die sú sament habent ietze oder noch gewúnnent, schedelich si, wer o^vch, das die vorgenanden drie grauen oder keiner vnder in ald ir erben ieman in kriege helfen woltin wider v´nser herren vnd frowen vorgenant vnd ir gemein erben, so sun wir vnd v´nser erben mit der vorgenanden vesti warten in burglehens wise dem vorgenanden v´nserm herren vnd frowen vnd ir gemeinen erbon. Vnd ze einem offen vrkúnd alles des, so vorgeschriben stat, geben wir disen brief besigelt mit v´nsren ingesigeln offenlich. Dis geschach vnd wart o^vch dirre brief geben ze sant Gallen in der stat, do man von gottes gebúrt zalte drúzehenhundert iar, dar nach in dem zwei vnd vierzigosten iare, an dem nechsten mantag nach sant V^olrichs tag.

Source Fulltext: Chartularium Sangallense VI, Nr. 3817, S. 383.