Ich Růdolf genant von Wille¹ ritter tůn kunt allen den, die disen brief sehent oder ho^erent lesen, vnd vergich offenlich an disem brief || fúr mich vnd min erben alle, daz ich der zwo vnd drissig march gůtez vnd lo^etiges silberz Costentzer gewiht, die mir der vehste vnd || frúme ritter her Lútolt sa^elig der Schenk von Landegge² gelopte ze gebenne ze hainstúr zů miner hûsfrôwen frô Iten siner tohter, || darumb er mir versatzte sinen hof, den man nemmet Walthershof³, vnd die hůb ze Roggenwille⁴, daz ich dez vorgescriben silber dester gewisser wa^er, von her Bernhart dem Schenken von Landegge⁵ lieplich vnd gu^etlich vnd gar vnd gantzlich gewert bin vnd emphangen han an baren vnd beraiten phenningen, vnd wan ich der vorgescriben zwo vnd drissig march silberz gar vnd gantzlich gewert bin, darumb so lâsse ich vnd hab gelassen mit disem brief die vorgescriben gu^eter Walthershof vnd die hůb ze Roggenwillen ledig vnd lôs vnd vnanspra^echig mit allen den rehten nútzzen vnd gewonhaiten, so zů den selben gu^etern geho^erent, vnd daz die vorgescriben satzzung vnd die brief, die darúber geben sint, von disem húttigen tag nach dem alz dirre brief geben ist vnnútz vnd vnkreftig sin súllent. Gescha^ehe aber, daz ich ald min erben ald ieman von minen wegen ald an miner stat kain ansprach ald vordrung iemer gewunnent ald hettent an die vorgescriben gu^eter von dez vorgescriben silberz wegen, die ansprach vnd die vordrung sol vnnútz vnd vnkreftig sin vnd der vorgescriben sach vnscha^edlich. Vnd daz ich hiewider niemer tu^ege mit worten noch mit werken noch mit kainen sachen, darumb enzihe ich mich vnd hab enzigen mit disem brief fúr mich vnd fúr min erben alle aller frihait, allez schirmez, aller helf gaistlichz vnd weltlichez gerihtz vnd allez dez, da^a) mit die vorgescriben sach mo^eht bekrenkt werden in^b) dehainen weg. Vnd daz diz war sie vnd sta^et vnd vnuerwandelt belîbe, darumb so han ich min insigel gehenkt an disen brief fúr mich vnd min erben alle. Dirre brief wart geben ze sant Gallen in der stat an dem na^ehsten samstag nach sant V^olrich tag in dem jar, do man zalt von gottes gebúrt drúzehenhundert jar, vierzig jar vnd darnach in dem andern jar.

Source Fulltext: Chartularium Sangallense VI, Nr. 3816, S. 382.