Allen den, die disen brief an sehent, lesent oder ho^erent lesen, kúnt ich Katherin Cůrtz sa^elgen elichú wirtenne von Horwen¹ vnd vergih offenlich an disem brief || fúr mich vnd fúr alle min erben, daz ich dem erberen man Eglolf dem Blarrer von sant Gallen burgern ze Costentz ze ko^vfen geben han disú gu^eter, dú || hie nah geschriben stant, ain hof, dem man sprichet dez Kra^egers hof, der ze Bichwille gelegen ist, da ainhalb an stosset Johan[s]^a) hof von Mageltsperg, der von || dem vorgenanten hof getailet wart, an den o^vch andrunthalb ain hof stosset, den man nemmet A^ebis hof, bi dem och ain hof gelegen ist, der wilunt Stro^elis waz ains burgers von Costentz vnd nu ze mal Johans von Sturzenegge² ist, den hof han ich dem vorgenanten Eglolf gegeben vmb ân ains fúnzig^b) phunt Costenzer phenning, vnd ain zehenden h[alben]^a) dez houes, dem man sprichet Spitzen Rúti, vnd entzwischan der Glat vnd Obernbúrron gelegen ist, an den ain hof stosset haisset Yhselberg, vnd ainen erberen kneht haisset Cůrt der Albraswiller vnd sin . . wip vnd . . sinú kint, den vorgenanten z[e]henden^a) vnd die vorgenanten lút han ich dem vorgenanten Eglolf gegeben vmb sibenzehen phunt Costenzer phenning, dez gůtez allez bin ich schon vnd . . .^a) gewert vnd han ez in minen redlichen nutz bewendet. Ich han mich och der vorbenempten gu^etern vnd lúeten [en]zigen^a) mit allen [d]en^a) rehten, so ich sú vntz har von dem gotzhus ze sant Gallen ze rehtem lehen gehebt han, da ich stůnt vor minem herren apt Herman dez vorgenanten gotzhus ze sant Gallen³ mit minem vogt Hainrich von Eppenberg⁴ minem brůder vnd mit minem fúrsprechen Johansen Wildrichen burger ze sant Gallen, vnd als mir mit gesamnoter vrtail da ze mâl vor geriht ertailet wart, da min vorgenanter brůder Hainr. von Eppenberg ze gegen waz, der mit mir gelobt het, der vorgenanten gu^eter vnd lút rehter wer ze sîn, wa sin der vorgenant Eglolf alder sin erben, ob er enwa^er, notdúrftig ist an weltlichem oder an gaistlichem geriht. Wa^er och, daz ich dú vorgenant Katherin vnd min vorgenanter brůder Hainr. von Eppenberg da wider iemer v^îtgeta^etin oder tůn weltin, so entzihen wir v´ns allez dez^b) rehten, da mit wir v´ns an weltlichem oder an gaistlichem geriht geschirmen mo^ehtin. Daz ist beschehen mit allen den dingen wort vnd werch, so dar zů gehort oder notdúrftig waz von reht oder von gewonhait, vnd dar vmb, daz diz allez wâr sie vnd sta^et belib, so henk ich dú vorgenant Katherin von Horwen min insigel an disen brief. Ich der vorbenempt Hainr. von Eppenberg vergich fúr mich vnd min erben, daz a^ellú dú ding, dú da vor an disem brief von mir geschriben stant, wâr sin vnd mit minem gůten willen vnd verhengde beschehen sint, vnd han ez gelobt mit gůten trúwen vnd loben an disem brief, sta^et ze haben vnd da wider niemer nút ze tu^ende. Vnd ze ainer merer sicherhait der vorgeschribenen ding so henk ich der dikbenenpt^c) Hainr. von Eppenberg min insigel an disen brief. Ich der vorbenempt Johans Wildrich vergich ainer warhait der vorgeschribenen ding, vnd dar vmb vnd durch bet wegen der [vor]benempten^d) fro Katherinun v[on Hor]wen^d) so henk ich min insigel an disem^c) brief. Der wart geben [do man]^d) zalt [von gotz ge]bú[rt drúzehen hundert iar, dar]^d) na[h in dem zw]ai^d) vnd viertzgosten iar, an dem na^ehsten fritag vor sant Martis tag.

Source Fulltext: Chartularium Sangallense VI, Nr. 3830, S. 393-394.