Ich Eglolf der Blarrer von sant Gallen burger ze Costentz tůn kunt allen den, die disen brief an sehent, lesent || oder ho^erent lesen, vnd vergich fúr mich vnd min erben, daz ich den hof, den man nemmet dez Kra^eger hof, || der ze Bichwille¹ gelegen ist, da ainhalb an stosset ain hof, der Johans Mageltspers² ist vnd von dem vorgenanten || hof getailet wart, an den anderthalb stosset ain hof, den man nemmet A^ebis hof, vnd den zehenden halben, der von dem hof gat, dem man sprichet Spitzzen Rúti³, der enzwischen der Glat⁴ vnd Oberbúrron⁵ dem dorf gelegen ist, vnd da ainhalb ain hof an stosset, der genemmet ist Yhselberg⁶, vnd ainen man, der gehaissen ist Cůnrat der Albraswiller, . . sin wip vnd .. sinú kint, ze rehtem lehen han, vnd minú rehten lehen sint von dem gotzhus ze sant Gallen, vnd die selben gu^eter vnd lút in nutzlicher gewer han, vnd daz ich dem conuent dez klosters ze Maggenowe⁷ die vorgenanten gu^eter vnd lút lihen sol vnd gelihen hab iemerme fúr mich vnd min erben vmb ainen sta^eten zins vmb ain hůn ia^erklich ze sant Gallen tult ze geben. Ich vergich och fúr mich vnd fúr alle min erben, ob der vorgenant . . conuent ze Maggenowe mo^eht erwerben mit kainen dingen an dem vorgenanten gotzhus ze sant Gallen, daz dú aigenschaft der vorbenempten gu^eter vnd lút iro werden mo^ehti, alder sú versetzen oder verko^vfen weltin, daz ich oder . . min erben sú dar an mit kainen dingen irren noch bekrenken sont, won sú dar an fúrderren, ân alle geua^ert, wenne och daz bescha^ehi, so sont die vorgenanten conuent frowan dez ebenempten zins gar vnd ga^entzlich ledig sin von mir vnd von minen erben. Wa^er och, daz der dikbenempt conuent kainú gu^eter me ko^vfti, dú in minen gewalt ka^emin, dú sont in allem dem rehten stan als dú gu^eter vnd die lút, die da vor benemmet sint. Vnd dar vmb daz dis wâr vnd sta^et belib, dar vmb so henk ich der vorgenant Eglolf der Blarrer min insigel an disen brief. Der geben wart, do man zalt von gotz gebúrt drúzehen hundert iar, dar nach in^a) dem zwai vnd vierzgestun iar, an dem na^ehsten mentag vor sant Martis tag.

Source Fulltext: Chartularium Sangallense VI, Nr. 3829, S. 392-393.