Allen den, die disen brief ansehend oder ho^erent lesen, kv´nd ich V^olrich von Ende probst des gotzhus von sant Gallen¹, das der || edel man Dietrich von Rúti von dem selben vnserm gotzhus von sant Gallen ze friem erbe hatte zwên zehenden, die gelegen || sint ze Vrwile vnd ze Vrsibach, den man spricht in der Zimbertu^ellen, vnd ein malter korn geltes, des ist ein mútte rogke, ein mv´t || weisse, zwen mv´tte habern, die vnser gotzhus alle iar git von vnserm zehenden ze Rôrbach dem vorg(enanten) zehenden ze helfe, als es mit teile harkomen ist zwischent vnserm gotzhus vnd dem vorg(enanten) Dietrich von Rúti, vnd von dien man git ellú iar vnserm vorg(enanten) gotzhus von sant Gallen ze erb zinse fúnf schillinge phenningen vnd ho^erent in den hof ze Rôrbach, die selben zehenden vnd daz malter kornes gab der selb Dietrich von Rúti vˆf lidig vnd lêre alle sin rechtunge in Heinr. hant des kellers von Rôrbach mins gewissen botten, als gewonlich vnd recht in dem hofe ist ze Rôrbach. Ez gab och vf die edel frowe fro^v Gůte von Bônstetten² dez selben Dietrichs von Rúti hvˆsfrowe in min hant alle die rechtunge, die si hatte an den selben zehenden vnd an dem malter kornes vorg(enanten), das vnser gotzhus git von lipdinges wegen, als es hie vor gemacht waz, vnd baten mich, die selben zehenden vnd das malter kornes ze lihend den geistlichen herren . . dem apte vnd dem gotzhus von sant Vrban dez ordens von Cytels in Costenzer bistům ze einem rechten erbe, daz och ich der selb V^olrich der probst getan han vnd verlúhen han dem selben gotzhus von sant Vrban ze rechtem erbe vnd alle iar da von ze gebende fúnf schillinge phenningen vnserm gotzhus ze erbe zinse, vnd han das getan mit vrlobe wissende vnd willen apt Hermans³ vnd . . der herren des gotzhus von sant Gallen, die es erlo^vbt hant von svnder liebi wegen des vorg(enanten) von Rúti vnd siner hvsfro^vwen, vnd han ich der vorg(enante) probst das gůt nvˆ zemal verlúhen brůder Wernher Finken zinsmeister des vorg(enanten) gotzhus von sant Vrban, der es an sins gotzhus stat emphangen hat, vnd swenne der selbe stirbet, so sol daz gotzhus von sant Vrban aber einen zů vns schiken, der es von mir oder von dem, der denne probst ist, oder von dem, der an des probstes stat ist, daz ist ein keller von Rôrbach, emphahen vnd tragen an irs gotzhus stat, vnd sol och denne der als vil erschatzes geben, als des erbe zinses ist, daz sint fúnf schillinge, vnd swie dike der stirbet, der das gůt treit vnd emphangen hat, so sol das gotzhus von sant Vrban ein andren dar schiken, der es trage vnd emphahe vnd erschatz gebe, der hie vor geschriben stât. Vnd harumbe ze einem offenen vrkúnde vnd bestetvnge so han ich disen brief besigelt gegeben mit minem ingesigel. Es hat och der vorg(enante) von Rúti sin ingesigel zů minem an disen brief gehenket ze einem vrkúnde, als hie vor geschriben stat. Dirre brief wart gegeben ze sant Gallen, an der einlif tvsent megden abende, des jars, do man von gottes gebúrte zalte tusent drúhvndert jâr, darnach in dem zwei vnd vierzigosten jâre.

Source Fulltext: Chartularium Sangallense VI, Nr. 3827, S. 390-391.