Wir Herman von gottes gnaden vnd des stůls von Rôme appet ze sant Gallen sant Benedictus || ordens Costenzer bistůms tůn kunt allen, die disen brief ansehend oder ho^erent lesen, vnd ver||iehen offenlich an disem briefe, das Dietrich von Rúti ein edel man vnd frio kam fúr Heinr. || keller, der phleger ist ze Rôrbach des kelnhofes von sant Gallen an hern V^olrichs von Ende vnsers probstes stat, vnd gab im vˆf lidig vnd lêre zwên zehenden, der einer lit ze Vrsibach vnd der ander ze Vrwile, den man sprichet zů der Zimbertu^ellen, vnd ho^erent in den vorgenanten hof von sant Gallen ze Rôrbach, vnd ein malter kornes, das wir ellú iar von vnserm gotzhus von dem zehenden ze Rôrbach dem vorgenanten Dietrich von Rúti von teiles wegen geben solten, von dien ierglichs gant ze erbe zinse fv´nf schillinge phenningen mit den gedingen, das er dú selben gu^eter in dem rechte, als er si hatte, lúhe den erbern vnd geistlichen herren . . dem apte vnd . . dem conuent des gotzhus von sant Vrban dez ordens von Cytels des egenanten Costenzer bistůms vmb als vil zinses, als vor genemet ist vnd er da von gab, die er inen lech nach vnsers gotzhus vnd des kelnhofes von Rôrbach gewonheit, als er vergicht an den briefen, die er inen darumb gegeben hat¹, vnd wand och wir vnd vnser gotzhus vnsern willen vnd gvnst hie zů gegeben hant, so bestêten wir vnd vnser gotzhus mit disem briefe alles das, das die vorgenanten Dietrich von Rúti vnd Heinr. kelner^a) phleger vnsers kelnhofes gegen dien egenanten geistlichen herren von sant Vrban vnd ir gotzhuse getan hant von dirre gu^etren wegen vnd vnser probst vorgenanter bestêtet² hat, vnd loben mit gůten trúwen fúr v´ns, vnser gotzhus vnd alle vnser nachkomen, diz ding vnd dise bestetunge stête ze hande iemermê, vnd daz wir noch vnser gotzhus niemer da wider getůn mit worten noch mit werken mit geistlichem noch mit weltlichem gerichte^b) oder anders keiner wis. Harumbe ze einer êwigen gehúgde vnd och ze einer merer sicherheit aller der vorgeschribener dingen so han wir vnser ingesigel gehenket an disen brief. Der gegeben wart ze sant Gallen, do man zalte von gottes gebúrt drúzehen hvndert jar, darnach in dem zwei vnd vierzigosten jâre, an der zweier heiligen zwo^elfbotten abende Symonis vnd Jude.

Source Fulltext: Chartularium Sangallense VI, Nr. 3828, S. 391-392.