Wir Růdolf von Wartinse probst der chilchen Zúrich¹ in Costenzer bischtům kúnden allen, die disen || brief sehent oder ho^erent lesen, das Johans Knopfli von Herdiberg² ein halbe juchert reban, dú gelegen || ist an Picken acker³ vnd stozet an Jo^erien gůt von Hanbu^el⁴ einhalb, anderent an Růd. seligen Brunners gůt, || vnd erbe ist von vnserm gotzhus vmb einen Zúricher pfenning jerlichs cinses, mit allem rechte, so dar zů geho^eret, vf gegeben hat ledeclich an vnser hant ze vnsers gotzhus wegen, vnd nach siner bette vnd siner kinden Berschis vnd Ellinen so haben wir die vorgeschriben halben juchert reban mit allem rechte friheit vnd der êhafti, so dar zů geho^eret, verlihen fron Elsbethen Burk. Sigfritz eins pfisters elicher wirtin ze einem rechten erbe von vnserm gotzhus vmb den vorgeseiten cins jerlichs da von ze gebenne, als man den cins vntz her gewonlich geben hat. Hier vmbe hat der vorgenant Johans Knopfli nach siner vergicht von der êgenanden fron Elsbethen Sigfridin inko^vffes wise enpfangen drizehenthalbs pfunt núwer Zúricher pfenningen vnd hat sich verzigen mit den vorgenanden sinen kinden vnd dú kint mit im vnd mit siner hant fúr sich vnd fúr ir erben, die si hie zů bindent, aller vorderunge rechtung vnd ansprach, so si nach den vorgeschriben reban mit allem rechte, so dar zů geho^ert, iemer dekeine wise mo^echten gewinnen an geistlichem oder an weltlichem gerichte. Ovch hat Johans Knopfli der vorgenant globt vnd bindet sin erben dar zů, der vorgeschriben halber juchert reban mit allem rechte, so dar zů geho^ert, der egenanden fron Elsbethen Sigfridin vnd ir erben wer ze sinne nach rechte fúr ein recht erbe von vnserm gotzhus vmb den vorgeseiten cins an allen stetten, wa oder wenne mans bedarf. Ovch sol man hie bi wissen, das dú vorgenant fro Elsbeth die vorgeschriben reban mit allem rechte, so dar zů geho^ert, mit vnser hant willen vnd gunst dem êgenanden Burk. Sigfrid ir wirte gemachet hat ze einem rechten lipdinge vnd ir beider kinden ze erbe, die si ietzent mit enander hant oder noch sament gewinnent. Vnd hier v´ber ze einem waren vnd vesten vrkúnde so haben wir vnschedelich vnsers gotzhus cinsen disen brief mit vnserm insigel besigelt offenlich. Dis geschach Zúrich an sant Valentins tag, do von gottes gebúrt waren drúcehen hundert jar vnd dar nach in dem dritten vnd vierzigosten jare, da ze gegen waren Ru^edger Meinhart vnser closterkelner, Johans Stro^eili in der Wisen⁵ von Herdiberg, Heinr. ab Burghalden, Růd. Knopfli vnd ander erber lúte.

Source Fulltext: Chartularium Sangallense VI, Nr. 3835, S. 396-397.