Allen, die disen brief sehent oder ho^erent lesen, kúnde ich herr Johans Múlner ritter schultheisse ze Zv´rich, das fúr mich kamen an der stat, da ich offenlich ze gerichte sas, die edeln erwirdigen herren || graf Johans von Habspurg, graf Růdolf von Habspurg gebrůdere vnd graf Go^etfrit von Habspurg ir beider brůder mit hern Walther V^olrich von der Alten Klingen frijen herren sinem erkorn vogte vnd of||fenberten alle drije vnerscheidenlich^a) offenlich do vor mir vmb den hof ze Tuggen mit allem recht, so dar zv^o geho^ert, der lehen ist von dem gotzhus ze Pfefers, als si den selben hof mit lút, mit gv^ote, mit allem || rechte, friheit vnd ehafti, so dar zv^o geho^ert, ze ko^vffen geben hetten dem edeln herren grafen Friderich von Toggenburg, als die brief wol bewisent vnd bewisen werdent, die ietz dar vber geben sint oder noch dar vber geben werdent. Vnd liessent die vorgenanten graf Rrůdolf^a) vnd graf Go^etfrid von Habspurg gebrůdere an recht, sit das der obgenant graf Johans von Habspurg ir brůder sin vertigvng des selben hofes volfv^ert hette mit sin selbes libe von der lehen hant, do aber si niht hin komen mo^echten oder enwo^elten, wie si die selben vertegvng volfu^eren solten, das es nv vnd hie nach gv^ot kraft haben mo^echte. Dar vmb wart rechtes gefraget, vnd wart nach miner frâge mit gericht vnd mit vrteild erteilt, wo der vorgenant graf Růdolf von Habspurg von sin selbs wegen vnd graf Go^etfrid von Habspurg mit des vorgenanten mines herren von der Alten Klingen sines erkornen vogtes hant willen vnd gvnst irú lehen des vorgenanten hofes ze Tuggen dem vorgeschriben gotzhus ze Pfefers vf santen bi dem vorgenanten grafen Johansen von Habspurg ir brůdere oder bi einem andern erbern manne, bi welhem si wolten, der des selben gotzhus man were vnd von im lehen hette, vnd o^vch das selb lehen bêten lihen dem obgenanten grafen Friderich von Toggenburg, das o^vch das nv vnd hie nach billich gv^ot kraft haben solte, vnd do das erteilt wart, do stv^ond der obgenant graf Rv^odolf von Halbspurg^a) von sin selbes wegen dar vnd o^vch graf Go^etfrit von Habspurg mit hern Walther V^olrich von der Alten Klingen dem vorgenanten sinem erkornen vogte, vnd santen beide irú lehen des vorgenanten hofes ze Tuggen ledig vnd lêr vf dem vorgeschriben gotzhus ze Pfefers bi dem obgenanten grafen Johs. von Habspurg ir brv^oder, der o^vch des selben gotzhus man ist vnd lehen von im hat, vnd gaben im vollen gewalt, das er von ir beider wegen bête vnd biten solte, das selb lehen lihen mit allem recht friheit vnd ehafti, so dar zv^o geho^ert, dem vorgenanten grafen Friderich von Toggenburg. Vnd do si dise vergicht, dise bêtte vnd vfsandv´nge offenlich vor mir getâten, als gericht vnd vrteild gab vnd recht was, do lie der vorgenant graf Friderich von Toggenburg an recht, ob im das gericht billich sinen brief her vmb geben solte. Der wart im von erbern lúten an gemeiner vrteil erteilt, vnd das o^vch die vorgenanten min herren von Habspurg alle drije vnd o^vch der obgenant min herr von Klingen ir ieklicher sin ingesigel henken so^elte an des gerichtes brief. Vnd her vber ze einem offen vrkv´nde, wan dis alles vor mir beschehen ist, als gericht vnd vrteil gab vnd recht was, so han ich min ingesigel ze des gerichtes wegen offenlich gehenket an disen brief. Wir die vorgenanten graf Johans von Habspurg, graf Rv^odolf vnd graf Go^etfrit von Habspurg gebrůdere veriehen offenlich alles des, so vor an disem brief von vns geschriben stat, das wir das veriehen vnd volfv^ert haben, als vns mit gericht vnd mit vrteild erteilt wart, das es nv vnd hie nach gv^ot kraft haben solte. Vnd des ze einer meren sicherheit so hat o^vch v´nser jeklicher sin ingesigel zv^o des schultheissen ingesigel offenlich gehenket an disen brief. Ich der vorgenant herr Walther V^olrich von der Alten Klingen frijer herre vergich o^vch offenlich alles des, so vor an disem brief geschriben stat. Vnd des ze einem offen vrkv´nde, wan ich es gesehen vnd geho^ert han vnd mit miner hant willen vnd gvnst beschehen ist, wan ich in dirre sache erkorner vogt bin des vorgenanten grafen Go^etfrits von Habspurg. Vnd des ze vrkv´nde so han ich min ingesige^a) offenlich gehenket an disen brief. Der geben wart ze Zv´rich, do man zalte von gottes gebúrte drúzehenhvndert vnd vierzig jar vnd dar nach in dem dritten jare, an dem nêchsten cinstag vor sant Thomans tag. Hie bi waren herr V^olrich von Montfort, herr Amor von Luterberg, herr Rv^odolf Biber, herr Růdolf der Truksetz, herr Heinr. Biber rittere, Růdolf Bruno burgermeister ze Zv´rich, Jacob Bruno sin brůder, Johans Krieg, Hug Krieg, Růdolf Herdiner vnd ander erber lúten vil.

Source Fulltext: Chartularium Sangallense VI, Nr. 3867, S. 421-422.