Allen, die disen brief sehent oder ho^erent lesen, kv´nde ich herr Johans Múlner ritter schultheisse ze Zv´rich, das fúr mich kamen an der stat, da ich offenlich ze || gerichte sas, die edeln erwirdigen herren graf Johans von Habspurg, graf Rv^odolf von Habspurg gebrůdere vnd graf Go^etfrit von Habspurg ir beider brv^oder || mit hern Walther V^olrich von der Alten Klingen frijen herren sinem erkornen vogte vnd offenberten alle drije vnuerscheidenlich offenlich do vor mir vmb den hof || ze Wangen, der lehen ist von den^a) gotzhus ze sant Gallen, vnd vmb den kilchensatz, der dar in geho^ert, als si den selben hof mit dem kilchensatz, mit lúte, mit gůte, mit aller rechtvng, friheit vnd ehafti, so dar zv^o geho^ert, recht vnd redelich ze ko^vffen geben hetten dem erwirdigen herren grauen Friderich von Toggenburg, als die brief wol bewisten vnd bewisent werdent, die ietz dar vber geben sint oder noch dar vber geben werdent. Vnd liessen an recht, wie si den selben hof vertigen solten von der lehen hant, das es nv vnd hie nach gv^ot kraft haben mo^echte vnd da mitte der vorgenant graf Friderich wol versorget were. Darvmb wart rechtes gefraget, vnd wart nach miner frage von erbern lúten an gemeiner vrteil erteilt, das si den selben hof mit allem recht, so dar zv^o geho^ert, vertigen solten von der lehen hant, vnd sid o^vch graf Johans von Habspurg die vertigvng mit sin selbes libe an die lehen hant volfv^eren wolte, wo er das tête, das o^vch das nv vnd hie nach billich gv^ot kraft haben solte, vnd sid aber die vorgenanten graf Rv^odolf vnd graf Go^etfrit von Habspurg gebrůdere an die lehen hant niht komen mo^echten oder enwolten, wo die beide irv´ lehen des vorgenanten hofes ze Wangen dem gotzhus ze sant Gallen vf santen bi einem erbern manne, der o^vch lehen von dem selben gotzhus hette, vnd das selb lehen bêtin lihen dem vorgenanten grafen Friderich von Toggenburg, das o^vch das billich nv vnd hie nach gv^ot kraft haben solte. Vnd do das erteilt wart, do stv^ond der vorgenant graf Johans von Habspurg dar vnd lobte die vertegvnge mit gv^oten trúwen ze volfv^erenne mit sin selbes libe. Es stv^ondent o^vch die obgenanten graf Rv^odolf von Habspurg vnd graf Go^etfrit von Habspurg gebrůdere dar vnd santen irú lehen des vorgeschriben hofes ze Wangen mit allem rechte, so dar zv^o geho^ert, vˆf dem gotzhus gen sant Gallen bi dem erbern frijen herren hern Walther V^olrich von der Alten Klingen, der o^vch des selben gotzhus man ist vnd dannan lehen hat, vnd gaben dem vollen gewalt, das er von ir wegen bête das lehen lihen dem vorbenemten graf Friderich von Toggenburg. Vnd do si dise vergicht, dise bette vnd vf sandvnge offenlich vor mir getaten, als gericht vnd vrteil gab vnd recht was, do lie der vorgenant graf Friderich von Toggenburg an recht, ob im das gericht billich sinen brief hervmb geben solte. Der wart im von erbern lúten an gemeiner vrteil erteilt, vnd das o^vch die vorgenanten min herren von Habspurg alle drije vnd o^vch der obgenant min herr von Klingen ir ieklicher sin ingesigel henken so^elte an des selben gerichtes brief. Vnd her vber ze einem offen vrkv´nde, wan dis alles vor mir beschehen ist, als gericht vnd vrteil gab vnd recht was, so han ich min ingesigel ze des gerichtes wegen offenlich gehenket an disen brief. Wir die vorgenanten graf Johans von Habspurg, graf Rv^odolf vnd graf Go^etfrit von Habspurg gebrůdere veriehen offenlich alles des, so vor an disem brief von vns geschriben stat, das wir das veriehen vnd volfv^ert haben, als vns mit gericht vnd mit vˆrteilt erteilt wart, das es nv vnd hie nach gv^ot kraft haben solte. Vnd des einer meren sicherheit so hat o^vch v´nser jeklicher sin ingesigel zv^o des schultheissen ingesigel gehenket an disen brief offenlich. Ich der vorgenant herr Walther V^olr. von der Alten Klingen frijer herre vergich o^vch offenlich alles des, so vor an disem brief geschriben stat, vnd des ze einem offen vrkv´nde, wan ich es gesehen vnd geho^ert han vnd mit miner hant willen vnd gvnst beschehen ist, wan ich in dirre sache erkorner vogt bin des vorgenanten grafen Go^etfrits von Habspurg, vnd des ze vrkv´nde^b) so han ich min ingesigel gehenket an disen brief. Der geben wart Zv´rich, do man zalte von gottes gebúrte drúzehenhvndert vnd vierzig jar vnd dar nach in dem dritten jare, an dem nêchsten cinstag vor sant Thomans tag. Hie bi waren her V^olr. von Montfort, herr Amor von Luterberg, herr Rv^odolf Biber, herr Rv^odolf der Truksetz, herr Heinr. Biber rittere, Rv^odolf Brvno burgermeister Zv´rich, Jacob Brvno sin brůder, Johans Krieg, Hug Krieg, Rv^odolf Herdiner vnd ander erber lúten vil.

Source Fulltext: Chartularium Sangallense VI, Nr. 3868, S. 423-424.