Allen, die disen brief sehent oder ho^erent lesen, kv´nden wir grave Johans, grave Rv^od. vnd grave Go^etfrit von Habspurg¹ gebrv^odere || vnd vergehen offenlich vmb die vier hvndert mark silbers, die vns die erbern lúte . . der burgermeister . . der rat vnd . . die burgere Zv´rich || geben svln von vnsers o^eheims wegen graven Frid. von Toggenburg², daz wir da dem selben vnserm o^eheime vmb daz silber ze ko^vffenne || svln geben so vil gv^eter, die vmb Grino^vwe³ vnd in der weide gelegen sint, die er genimt, als die vorgenânden erbern lúte . . den burgermeister vnd . . den rat Zv´rich ald, die von dem selben rate dar zv^o gesetzet werdent, zitlich dvnket vnd sich darvmbe erkennent, vnd mit namen, waz si sprechent vns ze gebenne, daz svln wir im vsrichten fúrderlich bi dem eide, so wir dar vmbe gesworn haben, ane allen fúrzvg. Wie si o^vch den selben von Toggenburg versorgent mit brieven vnd mit andern sachen, mit vsrichtvng des ko^vffes, daz svln wir o^vch stete haben vnd volfu^eren bi dem selben eide. Da wider sol vnser o^ehein von Toggenburg dem . . burgermeister vnd . . dem rate Zv´rich o^vch gehorsam sin, vf ze nemenne den ko^vf der gu^eter, der si sich erkennent, als vorgeseit ist, vnd waz si sprechent vnd heissent verschriben vmb den widerko^vf gen vns vnd gen vnsern erben, daz sol der selbe vnser o^ehein von Toggenburg stete halten, wan es o^vch also berêt ist. Vnd hier v´ber ze vrkv´nde so haben wir disen brief mit vnsern insigeln offenlich besigelt. Diz geschach Zv´rich an sant Remigen tag in dem jare, do man zalte von gottes gebúrte drv´zehen hvndert vnd viertzig jar vnd dar nach in dem dritten jare.

Source Fulltext: Chartularium Sangallense VI, Nr. 3851, S. 409-410.