Allen, die disen brief sehent oder ho^erent lesen, kv´nde ich Rv^od. Brvn bvrgermeister vnd wir die . . ra^ete vnd die . . bvrgere alle gemeinlich der stat ze Zv´rich vnd veriehen offenlich fv´r vns vnd fv´r alle vnser nachkomen, als wir mit^a) edeln herren graven Johs.^b), graven Rv^od., graven Go^etfr. von Hapspvrg gebrv^odern vnd o^vch mit dem . . vogte vnd dem . . rate vnd mit den bvrgern ze Rapreswile vnd mit ir lant vnd lv´ten, so von Zv´rich vf ietwederthalb dem sewe vntz an Glarvs vf gesesse sint vnd die selben graven angeho^erent, ein stete frv´ntschaft vnd ein ewig bvntnv´sse gen enandern gemachet vnd ze den heiligen gesworn haben, als die brieve wol bewisent, so v´ber die selben bvntnv´sse geben vnd verschriben sint¹, daz wir die selben bvntnv´sse vnd ewig geselleschaft gen dem . . vogte . . dem rate vnd gen den^c) bvrgern gemeinlich ze Rapreswile vnd gen allen ir nachkomen veste vnd stete haben svln mit gantzen triwen, vnd war vmb sich der . . vogt vnd . . der rat ze Rapreswile, welhe iemer vo^egte oder rat ze Rapreswile werdent, oder der mere teil vnder in erkennet vnd manet vmb hilfe, so loben wir mit disem gegenwúrtigen brieve, daz wir in danne fv´rderlich ane allen fv´rzvg vnd ane alle widerrede gen aller mangelichem, v´ber die si sich erkennent, geraten vnd behvlfen svln sin nach den worten vnd nach den stvcken der bvntbrieven, so wir ze beiden siten versigelt haben, ane allein gegen den vorgenanten graven Johs., graven Rv^od. vnd graven Go^etfr. von Habspvrg vnd gen der erben, gen den svln wir in nichtes behvlfen sin, wan o^vch daz selbe stvcke in der bvntnv´sse mit namen verredet ist, ane allein an dem stvcke, ob man si versetzen oder verko^vffen ald verpfenden wolte an vnser vrlop, gvnst vnd gv^otem willen, da svln wir in gen ir herren behvlfen sin, als o^vch die brieve² sagent, die beidenthalb dar v´ber verschriben sint, vnd anders nicht. Vnd hier v´ber etc. so haben wir dirre brieve zwene gelich geschriben mit vnser stat insigel offenlich besigelt. Actum Thur. Remigii anno XLIII°.

Source Fulltext: Chartularium Sangallense VI, Nr. 3852, S. 410.