Allen, die disen gegenwúrtigen brief ansehent alder ho^erent lesen, kvnden wir her Eberhart von Búrgelon ain fryer herre ritter vnd Eberhart || von Búrgelon¹ sin fetter vnd vergehin des offenlich an disem brief, das wir willeclich vnd mit gůter vorbetrahtvnge nach v´nser gůter frv´nde vnd ander erber || lúte rate Walthern dem Mayer von Altstetten² vnd fro Gepen siner elichen frowen vnd ir erben haben ze koffent geben reht vnd redelich v´nser burg ze || Landenberg die alten³, dv´ v´nser lehen was von dem abt vnd dem gotzhus ze sant Gallen, vnd lút vnd gůt vnd swas zů der selben burg ho^ert, mit wasen, mit zwi, mit waide, mit holtz, mit velde, mit a^ekkern, mit wisan, mit wasser, mit wasserlaiti, mit wegen, mit stegen, mit abweg, mit twingen, mit ba^ennen, mit gewaltsami, mit aller ehafti, mit allen nútzen vnd gewonhaiten vnd mit allen rehten gesůchs vnd vngesůchs gebûwen vnd vngebûwen, als dv´ selbe burg vnd lút vnd gůt an v´ns komen vnd braht ist vnd als wirz gehebt vnd genossen haben her vntz an disen hv´ttigen tag, also haben och wir inen vnd iren erben die selben Landenberg vnd lút vnd gůt vnd swas darzů ho^ert ze koffent geben vmb vierhvndert mark silbers lo^etiges Costentzer gewa^eges vnd sigin och der gar vnd ga^entzelich von inen gewert vnd sint in v´nsern redelichen nûtz komen vnd bekert, als wir vergehin an disem brief, vnd haben inen och die selben burg Landenberg die alten vnd lút vnd gůt vnd swaz darzů ho^ert mit allem reht mit vfgende an des abtes hant von sant Gallen gefertigot mit allen den worten werken vnd geta^eten, so darzů ho^ert ald geho^eren môht nach gewonhait vnd nach reht, darzů haben wir inen vmb das selbe silber ze koffent geben die vogtay ze Bidreswille⁴, dv´ lehen ist von der a^ebtissinne vnd dem gotzhus ze Zúrich⁵, vnd haben in die och an der a^ebtissinne hant gefertigot vnd vfgeben, als reht vnd gewonlich ist vnd als inen notdúrftig ist, âne geuerde, vnd haben v´ns darv´ber verzigen vnd verzihen v´ns willeclich vnd vmbetwungenlich mit disem brief fúr v´ns vnd fúr alle v´nser erben vnd nachkomen gen den vorgenanten Walther dem Mayer von Altstetten vnd gen fro Gepen siner elichen frowen vnd gen allen iren erben vnd nachkomen ze vrta^ete aller aigenschaft aller lehenschaft aller vordervnge aller ansprach alles schirmes alles vszugs aller hilf gaischelichs vnd weltlichs gerihtes vnd aller brief, die wir ald kain v´nser erbe vnd nachkomen ald ieman andre von v´nseren wegen gewinnen ald erwerben mo^ehtin vôme stůle ze Rôme vome riche ald anderswannan, da mit wir die vorgenanten burg Landenberg vnd lút vnd gůt vnd swas darzů ho^ert gar ald an aime taile kv´ndin ald mo^ehtin angesprechen ald da mit wir dis redelichen vngeuarlichen koffes kv´ndin ald mo^ehtin widerkomen, vnd wa^er, das die selben burg die alten Landenberg vnd lút vnd gůt vnd swas darzů ho^ert gar ald an aime tail ieman anspra^eche fúr aigen ald fúr lehen, des so^elin wir^a) v´nser erben si vnd ir erben verstan vnd versprechen vnd des ir reht wem sin gen ma^enlichem nach reht ane geuerde an gaischelichem vnd an weltlichem geriht vnd an allen stetten, da ez inen notdúrftig ist. Ez ist och geredd vnd mit ta^edingen begriffen, was lúte von der vorgenanten alten Landenberg gen Búrgelon komen vnd sesshaft sint her vntz vff disen húttigen tag, ez sien vrôwen oder man, die sont v´ns den von Búrgelon beliben vˆnanspra^echig, was och man vnd wip von Búrgelon gen Landenberg komen sint her vntz vff den selben húttigen tag, die sont Walthern dem Mayer vnd fro Gepen siner frowen vnd ir erben beliben och vˆnanspra^echig. Vnd ze warem vnd offeme vnd sta^eter vnd iemer ewiger sicherhait alles des, so hie an disem brief geschriben stat, geben wir die vorgenanten her Eberhart von Búrgelon vnd Eberhart sin fetter fúr v´ns vnd fúr alle vnser erben vnd nachkomen den selben Walthern dem Mayer von Altstetten vnd fro Gepen siner elichen frowen vnd allen iren erben vnd nachkomen darv´ber disen brief mit v´nseren aigenen insigeln besigelten. Dis beschach vnd ist dirre brief ze Costentz geben, do man von Cristes gebúrte zalte drv´zehenhvndert jar, darnach in dem vier vnd viezigosten^b) jar an^c)

Source Fulltext: Chartularium Sangallense VI, Nr. 3909, S. 458-459.