Allen, die disen gegenwúrtigen brief ansehent oder ho^erent lesen, kúnde ich V^edelhilt¹ Johansen von Stainach² || elichú wirtenne vnd verijch des offenlich an disem brief, daz ich mitt des selben Johansen mins elichen wirts || williger verhengde, gůtem willen vnd gunst gesunde libes vnd můtes mitt gůter vorbetrachtung daz hûs || vnd hofstatt vnd hofrayti ze Arbon³ gelegen, daz man da nemt im Kilchhof, dero aigenschafft mitt allen iren zůgeho^erden der herren vnd des gotzhus ze Pfa^euers⁴ ist sant Benedicten ordens in Kurer bistům gelegen, von minem herren dem abbt vnd dem selben gotzhus recht vnd redelich mir vnd allen minen erben vnd nachkomen enpfangen hab ze ainem rechten êrbzinslehen vmb zway hundert gůter ganguisch eweklich ja^erlichs zinses ie entzwischen wihenna^echten vnd der vasenacht den herren gen Pfa^euers ze antwúrtende, mitt solicher gedingt, wenne ich oder min erben oder nachkomen oder ie der, in des hant danne daz vorgenant hus vnd hofstatt oder hofrayti stât, den vorgenanten zinse allen aller ja^erlichs in den tagen, als vor ist beschaiden, gen Pfa^euers nit antwúrtent, so hatt ie danne der abbt vnd daz gotzhus ze Pfa^euers dú recht ze dem vorgenanten hûs vnd hofstatt vnd hofrayti, dú si och anderswa hant von recht oder von gewonhait ze den zinslehenn, da in ir zins v´berssessen wirt. Vnd ze warem vrkúnde der warhait aller dirre dinge gib ich inon disen brief mitt minem vnd^a) mins obgenanten elichen wirts insigeln besigelten. Ich der vorgenant Johans von Stainach verijch och offenlich mit disem brief, daz diz alles vnd iegelichs besunder mitt minem gůten volkomnen willen vnd gunst zů gangen vnd vollefu^ert ist, vnd dez ze ainer warhait hab ich min insigel gehenkt an disen brief. Der ist geben, do man von Cristes gebúrt zalt drútzehundert jar, dar nach in dem vierden vnd viertzgosten jar, an aller kindelin tag.

Source Fulltext: Chartularium Sangallense VI, Nr. 3871, S. 429.