Allen, die disen brief ansechent oder ho^erent lesen, kv´nden wir der vôgt vnd der rat der stât ze || Rappreswille¹, dz fúr v´ns kamen die erbern lúte Johans von Hasel² vnd Heinrize sin svn v´nser stette || burgere vnd veriachen vor v´ns offenlich, dz sú genzlich v´ber ein komen werin mit dien erwirdigen || geistlichen herren dem conmendúr vnd dem convente sant Johans ordens des huses ze Wediswiller³ von des stosses wegen, so sú mit ein andern hattont von der erbern fro^vwen wegen fron Ânnen saeligen ab dem Stade von Richtliswiller⁴, Heinrichs Haslers v´nsers burgers elichú wirtin, vnd dú recht eigen waz des gotzhvses ze Wediswiller sant Joh. ordens, mit dem gedinge, das Johans Haseler noch Heinr. sin svn noch der nachkomen niemer kein vorderunge noch ansprache gewinnen sunt an die vorg(enanden) geistlichen herren noch an ir nach komen von des gůtes wegen, so die vorg(enande) fron Annen an gehorte, es si eigen ligendes oder varendes, gúlte vnd waz gůtes gelegen ist en halb dem sew, dar zů die ê genanden herren recht habent, vnd o^vch von des gůtes wegen, so sich gezúchet v´ber die fúnfzig phunt, so Heinrich dem Hasler worden sint von disen vorg(enanden) gu^etern, son die erwirdigen herren sant Johans ordens des hvses ze Wediswiller niemer bekvnbert noch an gesprochen werden von Joh. von Hasel noch von Heinr. sinem svn noch von ir nachkomen weder an geistlichem noch weltlichem gerichte. Wan sol o^vch wissen, dz sich die ê genanden geistlichen herren von bette wegen v´nsers genedigen herren graven Joh. von Habspurg⁵ vnd von v´nser bette wegen verzichent aller der ansprache, so sú iemer gewinnen mo^echtin nv oder hie nach an Heinr. den Hasler oder an sin erben von der morgengabe, so er geben hatte frôn Annen siner elichen wirtin, dú des gotzhuses ze Wediswiller eigen was, vnd och was im worden ist von fúnfzig phunden, dz er o^vch an dem gůte vnbekúnbert sin sol von dien vorg(enanden) herren. Vnd des ze einem waren vrkúnde so geben wir disen brief besigelt mit v´nser stette eigennem ingesigel. Der geben wart ze Rapprechtswille, do man zalte von gottes gebúrte drúzechen hvndert jar, dar nach in dem vier vnd vierzigosten jare, an sant Verenen tag.

Source Fulltext: Chartularium Sangallense VI, Nr. 3899, S. 444-445.