Wir Herman von gottes vnd dez stůls gnâden ze Rome besta^eter abt dez gotzhuses ze sant Gallen¹ tu^egen kunt allen den, die disen brief sehent ald ho^erent || lesen, vnd vergehin offenlich an disem brief, das wir dem frummen vesten ritter hern V^olrichen von A^ems² vnd sinen erben vmb den gůten getrúwen || dienst, den v´ns der selb herr V^olrich von A^ems dike getan het vnd noch wol tůn mag, schuldig sient vnd redlich gelten súlint vnd v´nser nachkomen sechze||hen mark silbers gůtes vnd vnuersprochens Costentzer gewihtes, vnd habin ime vnd . . sinen erben darvmb recht vnd redlich versetzet ze ainem rechten werendem pfande vss dem hof ze Marpach³ zwai pfunt vnd fúnf schilling pfenning gelts, die man nemmet ka^es pfenninge, vnd drissig schillinge pfenninge gelts alles gůter vnd gna^emer Costentzer mv´ns vss den widemen ze Bernang⁴ in dem Rintal, mit solicher beschaidenhait vnd gedingde, wênne der selb her V^olrich von A^ems ald sin erben, ob er enwere, des vorgeschriben silbers von v´ns ald von v´nseren nachkomen vor sant Johans tag des Touffers vo^elleklich gewert vnd vssgericht werdent, das v´ns vnd v´nserm gotzhus dênne dú vorgeschriben gu^eter vnd pfender mit allen nv´tzen von inen ledig sint âne fúrzug, wurd aber er ald sin erben des vorgeschriben silbers von v´ns ald von v´nseren nachkomen vssgericht nah dem vorbenempten sant Johans tag, so sint inen o^vch darnach die nehsten vorgeschriben nv´tze vff den egenanten pfendern vnd gu^etern vo^elleklich geuallen âne widerrede. Vnd ze merer sicherhait aller dirre vorgeschribener dinge henken wir fúr v´ns vnd v´nser nachkomen v´nser insigel an disen brief. Der geben ist ze Wile⁵ in der stat, do man zalte von gotes gebúrte drúzehen hvndert jar, viertzig jar, darnach in dem fúnfsten^a) jar, an dem nehsten samstag vor sant Gregorien tag.

Source Fulltext: Chartularium Sangallense VI, Nr. 3913, S. 461.