Wir Herman von gottes vnd dez stůles gnaden ze Rome besta^eter abt dez gotzhuses ze sant Gallen¹ vnd wir die herren gemainlich dez selben conuentz vnd gotzhuses || in Costentzer bistům tu^egint kunt allerma^enlichen mit disem brief, daz wir mit gemainem râte durch nutz, notdúrft vnd besserung dez egenanten v´nsers gotz||huses uerkoffet hant vnd hin geben reht vnd redelich fúr ledig eigen von v´ns vnd v´nseren nachkomen dez egenanten v´nsers gotzhuses dem erberen geistelichem || manne brůder Růdolf von Bútikikon^a)2 sant Johans ordens comendúr ze Klingenowe³ vnd ze Biberstein⁴ vnd sunderlich dem hus ze Biberstein die hofstat mit der hof raiti, da der lúpriester vf sittzet ze Ko^ellikon⁵, vnd den aker, dem man nemmet der Wîde Aker vnd ainhalb stosset an die widem vnd ander halb an die zwen wide aker, vnd den kilchunsatz ze Ko^ellikon da mitte, den wir dar in geben hant vnd geho^eren sol, mit widemen vnd mit allen zehenden, nútzen vnd rehten, so dar zů ho^erent vnd geho^eren súllent, mit holtz, mit velde, mit stege, mit wege, mit wnne, mit weide, mit akern, mit matten, mit wasen, mit zwige, mit wasser, mit wasser rúnsen vnd mit allen nútzen, so vntz har dar zů geho^eret hant oder noch geho^eren mo^ehtint, si sient funden ald sú werdent noch funden, vnd habint dar vmb enphangen von dem vorgenanten brůder Růdolf von Búttikon ze dez huses handen von Biberstein vierzig mark vnd sehthalb mark silbers gůtes vnd ga^ebes Zúricher gewiht, dero wir gar vnd gantzlich ze v´nsern nútzen vnd dúrften nutzlich gewert sint ze dez vorgenanten v´nsers gotzhus handen, dez wir ueriehint an disem brief, vnd dar vmb so han wir v´ns willeklich vnd wolbedahtlich einhelleklich mit gemainem rât entzigen vnd entzihent v´ns mit disem brieue fúr v´ns vnd v´nser nach komen v´nsers ordens aller rehtung vorderunge vnd ansprach, so wir oder v´nser vordern ie gewnnent oder v´nser nachkomen immer gewinnen mo^ehtint ze denan vorgenanten hofstette, akern, kilchunsatze, widemen vnd zehenden vnd waz dar zů ho^eret oder noch geho^eren solte, ez sie offen oder uerschinnen, vnd lobent da wider nimmer ze tu^enne weder mit gaistelichem noch mit weltelichem gerihte bi v´nsern gůten trúwen ane geua^erde. Dar zů hant wir v´ns entwert vnd entweren v´ns mit disem brief aller gewer, so wir oder v´nsern vordern ie gewnnen ald v´nser nachkomen immer^b) gewinnen mo^ehtint zů den vorgenanten hofstette, aker, kilchunsatze, widemen, zehenden vnd ze allen den gu^etern vnd nútzen, so dar zů geho^erent nu oder her nach, vnd setzen den vorgenanten brůder Růdolf von Búttikon ze dez huses handen von Biberstein vnd ir nachkomen sant Johans ordens in liplich vnd in nutzlich gewer der vorbenempten gu^eter, ru^eweklich ze niessende, fridelich ze besitzende, ze besetzende vnd ze entsetzende, ze habende oder ze uerkoffende als ir eigen gůt ân v´nser vnd aller v´nser nachkomen wider rede. Wir der vorgenant abt Herman von gotz gnaden dez gotzhus ze sant Gallen vnd wir die herren gemeinlich dez selben gotzhus gelobent och fúr v´ns vnd v´nser nachkomen v´nsers ordens, dem vorgenanten brůder Růdolf von Búttikon ze dez huses handen von Biberstain vnd dero nachkomen sant Johans ordens, der vorgescribenun hofstete, aker, kilchunsatz, widemen vnd zehenden reht wer ze sin, als vor gescriben stat, mit allen rehten vnd nútzen, ez sie funden oder ez werde noch funden, an gaistelichem ald an weltelichem geriht vnd an allen stetten, wa sú werschaft bedurfent nach rehte bi gůten trúwen ân geua^erde. Vnd har vmb, daz dis war vnd sta^et vnd vnlogenhaft belibe nu vnd har nach, so han wir der vorgenant abt Herman dez gotzhus ze sant Gallen fúr v´ns vnd v´nser nachkomen vnd wir die andern herren gemeinlich dez selben gotzhus vnd conuentz von sant Gallen o^vch fúr v´ns vnd v´nser nachkomen v´nsers ordens v´nserú eigenen insigel gehenket an disen brief. Der geben wart ze sant Gallen, an sant Gregorien tag, do man zalte von gottes gebúrt drútzehenhundert jar, viezig^c) jar, dar nach in dem fúnften jare^d).

Source Fulltext: Chartularium Sangallense VI, Nr. 3916, S. 464-465.