Wir Herman von gottes gnaden besteter apt von dem stůl ze Rome des erwirdigen gotzhus von sant Gallen¹ vnd wir die herren gemeinlich des selben couentz vnd gotzhus von sant^a) || Gallen in Kostentzer biston tůn kunt allermenlichem mit disem briefe, daz wir mit gemeinem rate, dur nutz notdurft vnd bessrunge des egenanten vnsers gotzhus verko^vffet hein vnd hin geben || recht vnd redlich fúr ledig eigen von vns vnd vnsern nachomen des genanden vnsers gotzhus dem erberren geizlichem^b) manne brůder Peter von Kyenberg sant Johans ordens comendûr || ze Tungstetten² vnd sunderlich dem huse ze Tungstetten die hofstat ze Rorbach³, da der lúpriester vf sitzet, mit der hofreite vnd den kylchensatz ze Rorbach da mitte, den wir dar in geben han vnd geho^eren sol, mit widmen vnd mit allen zecheden^b), nútzen vnd rechten, so dar zů ho^erent vnd geho^eren sullen, dar zů die hofstat ze Êttingen⁴, da der lúpriester vf sitzet, mit der hofreite vnd den kilchensatz ze Ettingen da mitte, den wir dar in geben han vnd geho^eren sol, mit widmen vnd mit allen zechenden, nútzen vnd rechten, so dar zů ho^erent oder geho^eren sullen, mit holtz mit velde mit stege mit wege mit wnne mit weide mit akern mit matten mit zwigen mit walmen mit wasser mit wasser rúnsen vnd mit allen nútzen, so vntz har dar zů geho^eret hant oder noch geho^eren súllen, si sin funden oder si werden noch funden, vnd hein dar vmbe enphangen von dem vorgenanten brůder Petern von Kyenberg ze des huses handen von Tungstetten hundert march vnd einlifthalb march silbers gůtes vnd gebes Zúrich gewicht, dero wir gar vnd gentzlich ze vnsern nútzen vnd dúrften gewert sin ze des vorgenanten vnsers gotzhus handen, des wir veriechen an disem briefe. Vnd dar vmbe so han wir vns willeklich wolbedachtlich vnd einhelleklich mit gemeinem rate entzigen vnd entziehen vns mit disem briefe fúr vns vnd alle vnser nachomen vnsers ordens aller rechtunge vordrunge vnd ansprache, so wir oder vnser vordern ie gewnnen oder vnser nachomen iemer gewinnen mo^echten zů dien vorgenanten hofstetten, hofreiten, kylchensatzen, widmen vnd zechenden vnd waz dar zů vntz har geho^eret hat oder noch geho^eren sol, es si offen oder verschinnen, vnd loben da wider niemer ze tůnne weder mit geizlichem^b) noch mit weltlichem gerichte bi vnsern gůten trvwen an geuerde. Dar zů so han wir vns entwert vnd entwerren vns mit disem briefe aller gewer, so wir oder vnser vordern ie gewnnen oder vnser nachomen iemer gewinnen mo^echten zů dien vorgenanten hofstetten, kylchensetzen, widmen vnd zechenden vnd ze allen gu^etern vnd nútzen, so dar zů ho^erent nv oder har nach, vnd setzen den vorgeschriben brůder Petern von Kyenberg ze des huses handen von Tungstetten vnd ir nachomen sant Johans ordens in liplich vnd nutzlich gewer der vorbenempten gu^etern, růweklich ze niesende, fridlich ze besitzende, ze besetzende vnd ze entsetzende, ze habende oder ze verko^vffende alz ir eigen gůt an vnser vnd aller vnser nachomen widerrede. Wir der vorgeschriben herre apt Herman von gottes gnaden des gotzhus von sant Gallen vnd wir die herren gemeinlich des selben gotzhus geloben o^vch fúr vns vnd vnser nachomen vnsers ordens, dem vorgenanten brůder Peter von Kyenberg ze des huses handen von Tungstetten vnd dero nachomen sant Johans ordens der vorgeschriben hofstetten^c), hofreitenen, kylchensetzen, widmen vnd zechenden recht wer ze sinne, alz vorgeschriben stat, mit allen nútzen vnd rechten, si sin funden oder si werden noch funden, an geizlichem^b) oder an weltlichem gerichte vnd an allen dien stetten, da si werschaft bedúrfen, nach rechte bi gůten trúwen an alle geuerde. Vnd har vmbe daz dis war vnd stette vnd vnlo^vgenhaft belibe nv vnd har nach, so han wir der vorgenant apt Herman des gotzhus von sant Gallen fúr vns vnd vnser nachomen vnd wir die herren gemeinlich des selben gotzhus vnd couentz von sant Gallen o^vch fúr vns vnd vnser nachomen vnsers ordens vnsre eigene ingesigel gehenket an disen brief. Der geben wart ze sant Gallen, an sant Gregorien tag, do man zalte von gottes gebúrte drúzenhundert vnd viertzig jar, dar nach in dem fúnfften jare.

Source Fulltext: Chartularium Sangallense VI, Nr. 3915, S. 462-463.