Allen den, die disen brief an sehent lesent oder ho^erent lesen, kúnd ich Ba^ertelli Niesseli mines herren grafen Cůnrtz von Fúrstenberg¹ || amman ze Swartzenbach² vnd uergihe offenlich an disem brieue, daz fúr mich kam ze Rikenbach³ in dem obern houe fúr daz geriht, || da ich offenlich ze geriht sas, dú beschaiden vrowe Hertzlaude wilunt Hainrichs von Bútziswille⁴ elichú wirtenne vnd nam || da Hansen den eltern Bo^eschen burger ze Wile⁵ ze fúrsprechen, offenot da vor geriht mit ir fúrsprechen, daz ir sún Johans von Bútziswille⁶ daz gůt gelegen ze Swartzenbach, daz man nemmet der Lewis gůt, mit akern mit wisan mit holtz mit velde mit wasen mit zwige mit wnne mit waide mit stege mit wege mit wasser mit wasser rúnsen vnd mit allen rehten vnd nútzen, die dar zů hortint vnd dar in, daz gůt ir morgengabe gewesen wa^er, mit ir gůten willen gunst vnd uerhengde reht vnd redelich hetti verkoft vnd ze koffen gen⁷ der erwirdigen vrown vro Annun von Luterberg a^ebtissenne vnd dem conuent dez klosters ze Maggenowe⁸ vnd dem selben kloster vmb zwaintzig vnd vmb siben pfund pfenning gena^emer Costentzer múns, der sú gar vnd gantzlich gewert wa^erint vnd die sú in iro schinba^eren nutz hettint bewendet, vnd da von wo^elte si willeklich vnd vnbetwngenlich von ir morgengabe vnd von allen rehten, so si an dem vorgescriben gůt hetti gehebt, ledeklich gan vnd wo^elt ez vf gen der vorgenantun . . a^ebtissenne vnd conuent vnd dem closter ze Maggenowe, vnd bat ir ervaren an offenem geriht, wie si stan vnd daz tůn so^elte, daz es nu vnd hie nach kraft vnd maht hetti. Do fragt ich vrtailde vmb. Do wart ertailet mit gemainer vrtailde, daz si ainen vogt nemen so^elte vor offenem geriht v´ber die vorgescribenun sache vnd da mit ir vogtes hand willen râte vnd uerhengde ir vorgescribenun morgengab vnd a^ellú dú reht, dú si an dem vorgescriben gůt ze Swartzenbach ie hetti gehebt, ledeklich willeklich vf so^elte gen vor offenem geriht der vorgenantun a^ebtissenne dem conuent vnd dem closter ze Maggenowe, vnd daz si da solti sweren ainen gelert aide ze den hailgen, daz vorgescriben gůt vnd morgengabe niemmer me an ze sprechen noch daz vorgenant closter an dem vorgenanten gůt nimmer ze bekrenken vf gaistelichem noch vf weltelichem^a) geriht noch an reht dehainen weg. Do nam si Hans von Múnchwille schulthaissen ze Wile⁹ ze vogt v´ber dise sache vnd gab da willeklich vnd vnbetwngenlich mit ir vogtes willen râte vnd hand ir vorgescribenun morgengab vnd daz vorgenante gůt mit allen rehten vnd nútzen, die dar zů ald dar in ho^erent, ledeklich vor offenem geriht vf an der vorbenempten a^ebtissenne hand von^b) Maggenowe ze des conuentes vnd des selben klosters handen, vnd swr da ainen gelerten aide ze den hailgen, daz si daz vorgenante gůt noch ir vorgescribenun morgengab nimmer me an sprechen so^elte noch wo^elte vf gaistelichem noch vf weltelichem geriht noch an reht dehainen weg, vnd bat mich dú vorgenant Hertzlaude mit ir vogt ernstelich, der vorbenemptun erwirdigun a^ebtissenne vnd dem conuent dez^c) closters ze Maggenowe vnd dem selben closter hier v´ber dez gerihtes brief gen. Vnd ze merer sicherhait aller vorgescribener dinge vnd von emsiger bete wegen der vorgenantun Hertzlaudun vnd ir vogtes henk ich min insigel an disen brief. Ich Hans von Múnchwille schulthaisse ze Wile vergihe ainer gantzun warhait aller dinge, so der beschaiden man Ba^ertelli Niesseli amman ze Swartzenbach von mir an disem brief ueriehen het, vnd ze ainem waren vrkúnd der selbun dinge vnd^d) och ich vogt waz in diser sache, so henk ich och min insigel an disen brief. Dis geschach vnd wart dirre^e) geben, do von gottes gebúrt warent drútzehenhundert jar vierzig jar, dar nach in dem fúnften jar, an dem nahsten dunstag vor sant Walpurg tag ze in ga^endem maien.

Source Fulltext: Chartularium Sangallense VI, Nr. 3919, S. 467-468.