Allen den, die disen brief an sehent lesent oder ho^erent lesen, kúnd ich Hans von Bútziswille¹ vnd uergih offenlich an disem brieue, das || ich mit gůter vorbetrahtung vnd mit wolbedahtem sinne daz gůt gelegen ze Swartzenbach², daz man nemmet der Lêwis gůt, mit || akern mit wisan mit holtz mit velde mit wasen mit zwige mit wnne mit waide mit stege mit wege mit wasser mit wasser rúnsen || mit allen rehten nútzen vnd mit allen gewonhaiten vnd zů geho^erde, die dar zů vnd dar in geho^erent von reht ald von gewonhait, daz gůt min aigen waz vnd miner můter morgengabe ist gewesen, dú da von gangen ist vor offenem geriht³, als reht waz, reht vnd redelich han verkoffet vnd ze koffen geben der êrwirdigun vrown vro Annun von Lúterberg der a^ebtissenne vnd dem conuent dez closters ze Maggenowe⁴ vnd dem selben kloster vmb zwainzig pfund vnd vmb siben pfund pfenning gena^emer Costentzer múns, der ich gar vnd gantzlich gewert bin vnd die ich in minen redelichen schinba^eren nutz han bewendet, vnd entzihe mich mit disem brieue aller der reht vnd ansprach, so ich ald min erben an dem vorgenanten gůt vnd an allen rehten vnd nútzen, die dar zů vnd dar in ho^erent, ie hettunt ald gewnnent ald hie nach immer gewinnen mo^ehtint von reht ald von gewonhait, vnd sol ich vnd min erben dez vorgescriben koffes vnd och gůtes wer sin nach reht, wa sin dú vorgenant . . a^ebtissenne vnd der conuent vnd daz closter ze Maggenowe bedurfent vnd notdurftig sint vf gaistelichem ald vf weltelichem geriht. Vnd ze merer sicherhait aller vorgescribener dinge henk ich min insigel an disen brief. Dis geschach vnd wart dirre brief geben, do man zalte von gottes gebúrt drútzehenhundert jar vierzig jar, dar nach in dem fúnften jar, an dem na^ehsten dunstag vor sant Walpurg tag ze in ga^endem maien.

Source Fulltext: Chartularium Sangallense VI, Nr. 3918, S. 466.