Allen den, die disen brief sehent lesent oder ho^erent lesen, kúnde ich Johans von Bútzzeswille¹ vnd vergich des offenlich an disem brieue fúr mich || vnd fúr alle min erben, das ich mit gůter vorbetrahtung vnd beschaidenhait reht vnd redlich verko^vfft vnd ze ko^vffen geben han dem || erbern vnd wolbeschaiden man Cůnrat dem Schubinger burger ze Vtzzena² den zehenden halben ze Obrenbatzzenhan^a)3 mit allen rehten || nútzzen vnd gewonhaiten, so darzů ald darin geho^erent, vnd als ich in vntz her gehept vnd genossen han, vmb sehs vnd sehszig phunt phenning gůter vnd ga^eber Costentzer múnse, der ich gantzlich vnd gar von im gewert bin vnd emphangen han vnd an minen offenbarn nutz bekeret an den stetten, da ich minen grossen schaden mit verkomen han. Den vorgeschriben zehenden han ich dem êgenemten Cůnrat dem Schubinger geuertgot mit des erwirdigen mines gena^edigen herren hant abt Hermans abt des gotzhus ze sant Gallen⁴, als reht sitte vnd gewonlich gewas. Ich vergich o^vch offenlich an disem brief, das ich gelopt han, das ich vnd min erben des vorgeschriben Cůnrat des Schubingers vnd siner erben reht wern súllint sin nach lehens reht vmb den vorgeschriben halben zehenden gen aller menlichem vnd an allen stetten, da es inen notdurftig ist an gaistlich ald an weltlichem geriht, vnd ist dis alles geschehen mit worten vnd mit werken, so darzů gehort vnd notdurftig warent von reht vnd von gewonhait. Vnd ze ainem waren vrkúnde vnd sta^eter sicherhait der vorgeschriben dinge so han ich dem vorgeschriben Cůnrat dem Schubinger vnd sinen erben disen brief besigelt geben mit minem aigen insigel. Dirre brief wart geben ze sant Gallen in der stat, an vnser frowen abent ze mittem o^vgsten, in dem jar, do man zalt von gottes gebúrt drúzehen hundert jar vierzig jar vnd darnach in dem fúnften jar.

Source Fulltext: Chartularium Sangallense VI, Nr. 3947, S. 489.