Allen, die disen brief ansehent, lesent oder ho^erent lesen, tůn ich Eglolf der Ômme¹ ritter kunt || vnd vergih offenlich an disem brieue fúr mich vnd fur alle min erben vnd nahkomen, das der erwirdig || min gna^ediger herre von gottes gnaden abt Herman des gotzhus ze sante Gallen² die fúnf mutte || kernen geltes vsser dem houe ze Gossowe³, die min pfant waren von dem vorgenemten gotzhuse ze sante Gallen, gantzlichen vnd gar erledgot hât von mir vnd erlo^eset, das er noch das gotzhus mir nút me dauon noch da bi schuldig sint noch gelten son, vnd das ich die selben fúnf mutte kernen geltes gantzlich vnd gar ledig gelassen han vnd ledig lasse mit disem brieue, das ich noch kain mîn erbe kain reht hinnanhin daran noch darzů haben noch haben súlin von kainer hande sache wegen. Wa^er ouch, das ich ald min erben kainen brief⁴ fúndin vmb das selb pfant, der sol kain kraft noch maht fúrbas han, vnd súlin wir ouch von des selben brieues wegen anhain reht han an dem selben noch zů dem selben pfande. Ich han ouch gelobt mit gůten trúwen, ob ich dem^a) brief vinde, den ich hatte vmb das selb pfant, das ich den ân allen fúrzug vnd ân alle geua^erde minem vorgenanten herren abt Herman ald sinen nahkomen, ob er enwa^ere, wider geben sol. Vnd ze ainem wâren vrkúnde vnd ze ainer sta^etun sicherhait der vorgeschriben dinge henk ich min insigel an disen brief. Der geben ward ze sante Gallen in der stat, do man zalte von gottes geburt drúzehenhundert jâr, viertzeg jâr, darnah in dem fúnften jare, an sant Barnabas tage.

Source Fulltext: Chartularium Sangallense VI, Nr. 3926, S. 474.