Wir graf Johans, graf Růdolf vnd graf Go^etfrit von Habspurg gebrůdere tůn kvnt allen, die disen brief sehent oder ho^erent lesen, vnd veriehen offenlich, das || wir den hof vnd die vogtey ze Erlibach mit túbe mit frefni mit aller rechtung friheit vnd ehafti, so dar zů geho^ert, als wir die selben vogtey vntz her gehebt gefu^ert || vnd genossen haben vnd si vnser vordern an vns bracht hant, recht vnd redelich ze ko^vffen geben haben vnserm lieben o^eheim grafen Fridrich von Toggenburg vmb zwei hvndert || mark gůtes vnd lo^etiges silbers Zúrich gewicht, der wir alleklich von im gewert sijen vnd in vnsern nvtz bekert haben, vnd haben o^vch mit gv^oten trúwen gelopt fúr vns vnd vnser erben vnd nachkomen, die wir hie zv^o binden, des selben hofs vnd der vogtey ze Erlibach mit allem recht, so dar zv^o geho^ert, recht wern ze sinne des obgenanten vnsers o^eheims grafen Fridrichs von Toggenburg vnd siner erben fúr ir irecht^a) lechen von dem gotzhus der abtey ze den Einsidellen, dannan o^vch wir si im gevertiget haben, an geistlichen vnd an weltlichen gerichten vnd mit namen an allen stetten, wo vnd wenne man des bedarf, mit gůten trúwen an alle geverde. Wir haben o^vch vns fúr vns vnd vnser erben gentzlich entzigen an des obgenanten vnsers o^eheims hant von Toggenburg alles rechten vordervng vnd ansprache, so wir nach dem vorgenanten hof vnd der vogtey ze Erlibach mit allem recht, so dar zů geho^ert, gen im vnd gen sinen erben an geistlichen vnd an weltlichen gerichten dekein wis iemer gewinnen mo^echten an alle geverd. Vnd her vber ze einem offenn vrkúnd, das dis vorgeschriben alles war si vnd stêt belibe, so geben wir die vorgenanten grafen von Habspurg alle drij disen brief mit vnsern ingesigeln offenlich besigelt. Der geben wart, do man zalte von gottes gebúrte drúzehenhvndert vnd vierzig jar, dar nach in dem fúnften jare, an dem nêchsten mêntag vor sant Andres tag.

Source Fulltext: Chartularium Sangallense VI, Nr. 3959, S. 497.