Ich V^olrich von Enne pfleger probst vnd portner des gotzhus ze sant Gallen¹ tůn kunt vnd vergich offenlich an disem brief || fúr mich vnd fúr alle min nahkomen allen, die in an sehent lesent oder ho^erent lesen, das ich an sieh vnd angesehen hab die dank||na^emen getrúwen dienste, die min lieben lantlúte von Appacelle, von Huntwille, von Túffen, von Vrna^eschen, von Wittenbach, von || Na^engeswille vnd von dem Rodmonten, die mir vnd minem gotzhus versetzet sint von dem riche, mir vnd minem gotzhus dik willeklichen getan hant vnd noch getůn mugen, darumb hab ich durch nutz vnd besserung der selben lender mit gůter vorbetrahtung vnd beschaidenhait in die genad vnd die gu^etlichi willeklich vnd frilich getan vnd tůn mit disem brief fúr mich vnd fúr alle min nahkomen, das ich vnd alle min nahkomen sú wellen vnd súlen lassen beliben von des riches wegen vnd von der vogtay wegen mit stúran vnd mit andren diensten in allen den rehten vnd gewonhaiten, als sú das rich an mich braht hat. Ich sol och ia^erklich ain stúr von in nemen vnd nút mêr. Wa^er och, das der selben lantlút dehaine verschulti, darumb man von des riches wegen rihten so^elti, darumb sol ich nieman twingen ze klagenne, sú wellen denne selb gern klagen. Vnd ze ainem waren vrkúnde vnd ze ainer sta^etun sicherhait aller der vorgeschriben ding henk ich min insigel, so ich von der pfleg han, an disen brief. Der geben ward ze sant Gallen in der stat, do man zalt von gottes gebúrt drúzehenhundert jar, vierzig jar vnd darnah in dem sehsten jar, an dem na^ehsten ma^entag nah dem balm tag.

Source Fulltext: Chartularium Sangallense VI, Nr. 3974, S. 507.