Allen, die disen gegenwúrtigen brief ansehent alder ho^erent lesen, kv´nde ich Hainrich Goldast burger ze Costentz vnd vergihe des || offenlich an disem brief, das ich mit gůtem willen vnd mit gůter vorbetrahtvnge nach miner gůten frv´nde rate Egelolf dem || Blarrer burger ze Costentz vnd sinen erben habe ze koffent geben reht vnd redelich den hof, der an der Hůb¹ zwischen Erthusen² vnnde || Stainibrvnnen³ gelegen ist, der lehen ist von Costentz, vnd swaz zů dem selben hof ho^ert, ez sie mit wasen mit zwi mit waid mit holtz mit velde mit wisan mit a^ekkern mit wegen mit stegen mit wasser mit wasserlaiti mit aller ehafti mit allen nútzen vnd gewonhaiten vnd mit allen rehten gesůchs vnd vngesůchs wissendes ald vnwissendes, als der selbe hof an mich komen vnd braht ist vnd als ich in gehebt besessen vnd genossen hab her vntz an disen hv´ttigen tag, also hab och ich im den selben hof ze koffent geben vmb ffv´nfzek pfvnde âne vier schilling gůter pfenninge Costentzer mv´ns vnd bin och der gar von im gewert vnd sint in minen redelichen nutz komen vnd bekert, als ich vergihe an disem brief, vnd hab im och den selben hof mit den rehten, so vorgeschriben stat, mit vfgende an des bischoffes hant von Costentz⁴ gefertigot mit allen den worten vnd werken, so darzů hort ald geho^eren moht nach gewonhait vnd nach reht, vnd habe mich darv´ber verzigen vnd verzihe mich an disem brief fúr mich vnd fúr alle min erben vnd nachkomen gen dem vorgenanten Egelolfen dem Blarrer vnd gen allen sinen erben vnd nachkomen an dem vorgenanten hof aller aigenschaft aller lehenschaft aller vordervnge aller ansprach alles schirmes alles vszugs vnd alles rehtes gaischelichs vnd weltlichs gerihtes, da mit wir ald iêman andre von v´nseren wegen den vorgenanten hof vnd swas dar zů ho^ert gar ald an aime tail kv´ndin ald mo^ehtin angesprechen ald da mit dirre redelich vngeuarlich koff kv´nd ald mo^eht in kain wise bekrenket ald gebrochen werden, vnd wa^er, das den selben hof gar ald an aime tail iêman anspra^eche fúr aigen ald fúr lehen, des so^elin ich vnd min erben in vnd sin erben verstan vnd vertretten vnd des ir reht wem sin gen ma^enlichem nach reht âne geuerde an allen stetten, da es inen notdúrftig ist. Vnd zainem vrkv´nde der warhait vnd zainer sta^eter sicherhait aller dirre vorgeschriben dinge gib ich der vorgenante Hainrich Goldast fúr mich vnd fúr alle min erben vnd nachkomen dem selben Egelolf dem Blarrer vnd allen sinen erben vnd nachkomen darv´ber disen brief mit minem aigen insigel besigelten. Dis beschach vnd ist dirre brief ze Costentz geben, do man von Cristes gebúrte zalte drv´zehenhvndert jar, darnach in dem sehs vnd vierzigosten jar, an dem hailigen abende ze wihennehten.

Source Fulltext: Chartularium Sangallense VI, Nr. 4005, S. 531-532.