Wir^a) brůder Herdegen von Rechberg sant Joh. ordens des heiligen spitals von Jerusalem commendúr || des hvses ze Wediswille¹ vnd wir die brůder gemeinlich des selben huses tu^egen kvnt allen, die || disen brief an sechent oder ho^erent lesen, dz fúr v´ns kam fro Margreta, dú Joh. saeligen Gamlensteins² || elichú wirtin was, mit Růd. Gamlenstein ir svn vnd gaben vf an v´nser hant mit bedachtem můte vnd mit gesvndem libe jungfro Claren Heinrichs Gamlensteins² tochter, dú v´nsers gotzhuses eigen ist, dz gůt, dz gelegen ist ze dien Hútten³, vnd ein geteillit waz des gůtes hern Peters von Húnaberg⁴, dz selbe gůt jerlich giltz^b) sechzechen mút^c) kernen, sechs mal(ter) habern, ein halb viertel anken, ein zigern vnd zwei hu^enr, disú vorgeschriben gu^eter fro Margareta Joh. saeligen Gamlensteines wirtin vnd Růd. ir sun v´ns vf geben hant ze jungfro Claren handen, vnd hant sich o^vch verzichen aller der ansprache rechtunge vnd e hafti, so sú oder ir nachkomen iemer gewinnen mo^echtin in kein weg an dz vorg(eschriben) gůt. Wan sol o^vch wissen, dz dú e genande jvngfro Clare mit disem vorbenemten gůte nicht tůn sol noch in keinen weg veraenderren wan mit v´nser wissende gunst vnd gůtem willen. Weri o^vch, dz dú vorg(eschriben) jungfro^v Clara sturbi vnd dz vorgeschriben gůt, dz ir gegeben ist fúr achzig march silbers, dz si dz nicht verandert hetti bi ir lebtagen, so sol dz selbe gůt gentzlich gevallen sin an jvngfro Claren rechten erben. Vnd ze einem waren vnd steten vrkúnde der vorgeschriben dingen so geben wir brůder Herdegen von Rechberg vorgeschriben disen brief besigelt mit v´nsrem vnd des huses ze Wediswille eigennen ingsigelen. Dis beschach vnd wart dirre brief geben, do man zalte von gottes gebúrte drúzechen hvndert jar, dar nach in dem siben vnd vierzigosten jare, an dem nechsten samstag vor sant Georiien tage.

Source Fulltext: Chartularium Sangallense VI, Nr. 4024, S. 544.