Allen den, die disen gegenwúrtigen brief ansechent oder ho^erent lesen, kúnde ich her Johans von Haidelberg¹ ritter vnd vergich offenlich, das ich minen || hof, der ze Ranwile² gelegen ist, den man nemmet der Ober hof, mit ackern mit wisen mit holtze mit velde mit wasen mit zwije mit stege || mit wege mit wasser mit wasser rúnsen vnd mit allem dem recht frihait vnd der ehafti, so zů dem selben hof geho^eret, fúr fri ledig || aigen ze ko^vffenne geben han . . dem capitel gemainlich des gotzhuses ze Bischofcelle³ vmb fúnf vnd viertzig pfunt gůter Kostentzer pfenning genger vnd geber múntze, der ich nach miner vergichte gar vnd gantzlich von dem vorgenanden . . capitel gewert bin vnd in minen gůten nutz bewendet han. Vnd han mich hier vmbe fúr mich vnd fúr min erben, die ich hie zů binde, verzigen aller der rechtunge vorderunge vnd ansprache, die ich nach dem vorgenanden hof ze Ranwile mit allem dem recht, so dar zů geho^eret, iemer dekaine wise mo^echte gewinnen mit gaistlichen oder mit weltlichen gerichten ald mit kainen andren sachen, so ieman erdenken kan oder mag. Ovch han ich gelobt vnd binde min erben dar zů vestelich, des vorgenanden hofs ze Ranwile mit allem dem recht, so dar zů geho^eret, wer ze sinne des obgenanden capitels gemainlich des gotzhuses ze Bischofcelle nach rechte fúr fri ledig aigen an allen stetten baidú vor gaistlichen vnd vor weltlichen gerichten, wa oder wanne man des bedarf. Vnd hier v´ber ze ainem waren vnd vesten vrkúnde so han ich disen brief mit minem aigen insigel offenlich besigelt. Dis geschach vnd wart dirre brief geben ze Bischofcelle in dem jare, do man von gottes geburt zalte drúcehenhundert vnd viertzig jar vnd dar nach in dem sibenden jare, an dem nechsten mentag vor sant Waltpurg tag ze ingandem maijen.

Source Fulltext: Chartularium Sangallense VI, Nr. 4025, S. 544-545.