Allen dien, die disen brief an sehent oder ho^erent lesen, kúnden wir graf Johans, graf Růdolf vnd graf Go^etfrid von || Habspurg gebrůder¹ vnd feriehen offenlich an disem brief, das wir mit bedachtem můt vnd gůtem rat v´ns||serm lieben getrúwen Otten von Ranbach burger ze Rapreswil² vnd sinen erben, ob^a) enwere, ze ko^vfenne geben hant || recht vnd redlich ierlichend sechtzig mút kernen geltes vf der múli in der stat ze Rapreswil vmb achtzig march silbers gůtes vnd genges Zúricher gewichtes, die wir von inen enpfangen hand vnd die gantzlichent in v´nseren offenbaren nútz komen sindt, dis forgenanten zins allen wir oder v´nser erben vnd nakomem^b) richten vnd geben súllent Otten von Ranbach vnd sinen erben, ob er enwere, jerlichend ze sant Martis tag von der vorgenanten múli, wer aber, das dú forgenante múli als bresthaft wurde, das si den vorgenanten zins nit gelten mo^echt, es wer v´rlúg oder brand oder von krieges wegen ald wie das zů gienge, das Otto von Ranbach vnd sinen erben der zins nit alleklich wurde vf sand Martis tag, als vor geschriben stat, so haben wir die vorgenanten grafen alle driie gelobt fúr vns vnser^c) erben vnd nachkomem^b), die die múli inne hand, Otten von Ranbach vnd sinen erben vs richten súllend von andern v´nserm gůte als vil, das inen die sechzig mút kernen jerlich^d) volle wert werdend, die er ko^vft hat vf der forgenanten múli in der stat ze Rapreswil, als vor geschriben stat, an fúrzug. Man sol o^vch sunderlich wissen, das dir vorgenante ko^vf beschehen ist mit solichen gedingen, wenne wir oder v´nser erben Otten von Ranbach oder sin erben ermanen mit achzig march silbers der forgenanten gewicht vnd gůtes silbers vor sant Johans tag ze súngichten, so sind v´ns oder v´nsern erben die vorgenanten sechzig mút kernen vf der vorgenanten múli gantzlich ledig vnd los an fúrzug, wer aber, das wir oder v´nser erben Otten von Ranbach vnd sin erben ermanen mit dem vorgenanten silber nach sand Johans tag ze súngichten, weles jares das beschicht, so ist Otten von Ranbach vnd sinen erben des jares der zins gefallen vnd nit fúrbasser. Vnd des alles ze einem warem festen vnd stetem vrkúnd alles des, so hie for geschriben stat, so haben wir die vorgenanten grafen alle driie disen brief offenlich besigelt mit vnsern insigeln. Der geben wart an dem nechsten zinstag vor sand Johans tag ze súngichten, do man zalte^e) von gottes gebúrt drúzehen hundert jar vnd vierzig jar, dar nach in dem sibenden jare.

Source Fulltext: Chartularium Sangallense VI, Nr. 4037, S. 550-551.