Wir Herman von gottes gnaden abt¹ vnd aller der conuent gemainlich des gotzhus ze || sant Gallen veriehen vnd tu^en kunt an disem brief allen, die in ansehent lesent oder ho^erent || lesen, das wir v´nser getrúwen lieben Johansen von Múnchwille schulthaissen vnd vnser burger || gemainlich ze Wîl² gehaissen haben, das sú mit den gewonlichen stúren, die v´ns ja^erlich ze Wîl werden solten, disen fromen wolbeschaiden hern Eglolfen dem eltern von Roschach³, hern Herman von der Braiten Landenberg⁴, hern Hainrich Walther von Sultzberg⁵, hern Cůnrat dem schenken von Landegge⁶ alle ritter, V^olrich Brandhoh von Sagx⁷, Walthern von Bichelnse⁸, Johansen von Múnchwille schulthaiz ze Wil, Hainrich dem Giel von Glatburg⁹, Růdolf dem Aster, V^olrich dem jungern Spiser, V^olrich Kaltysen vnd Burkart dem Risen warten son vnd in sú geben son vntz vf das zil, das sú ledig werdent ân schaden von der búrgschaft, so wir sú versetzet haben vmb die gúlt, die wir Cůnrat Kaltysen burger ze Wintertûr¹⁰ schuldig sint. Vnd veriehen o^vch, was sú den vorgenemten búrgen gebent von der stúr wegen in dem selben zil, das sú des von v´ns gantzlich ledig sint vnd sin sont. Vnd ze ainem wâren vrkúnd vnd sta^eter sicherhait der vorgeschriben ding haben wir abt Herman vnd der conuent gemainlich des vorgenemten gotzhus v´nser vnd v´nsers conuentes insigel gehenket an disen brief. Der geben ist in der stat ze sant Gallen, do man zalt von gottes gebúrt drúzehenhundert jâr, vierzig jâr vnd dar nach in dem sibenden jar, an der na^ehsten mitken vor sant Johans tag des To^vffers ze súngihten.

Source Fulltext: Chartularium Sangallense VI, Nr. 4038, S. 552.