Wir Herman von gottes vnd dez stůles gnaden ze Rome besta^eter abt dez gotzhus ze sant Gallen¹ tu^egint kunt || vnd veriehint offenlich an disem brief allen, die in lesent ald ho^erent lesen, daz fúr v´ns kament v´nser lieben getrúwen || diener V^olrich vnd Hainrichwalther die Giel von Glatburg² gebrůder vnd mit v´nser hand willen vnd gunst dise || nahgescriben lúte Cu^enin Walthers von Waibelingen³, sin wib vnd sinú kind, Elizabetun von Waibelingen vnd irú kind, Ru^edin W^esten von Waibelingen, sin wib vnd sinú kind, die lúte von v´ns vnd v´nserm gotzhus iro lehen sint, gemainlich von iro not wegen v´nserm lieben o^ehain hern Eberhart von Búrglon⁴ frigen vnd ritter versastunt vnd versetzet hant mit allen rehten vnd nútzen, als sús vntz her genossen vnd inne gehebt hant, ze ainem wernten pfande vmb aine mark silbers gůtes vnd vnuersproches Costentzer gewihtes, daz silber sú im schuldig sint vnd redelich gelten sont von lihens wegen, vnd ist disú versatzung geschehen mit so^elicher beschaidenhait, wenne v´nser o^ehain her Eberhart von Búrglon riter vnd [frige]^a) ald sine erben, ob er enwa^er, mit dem vorgescriben silber von V^olrichen vnd Hainrichenwalthern der vorgenanden [Gielen]^a) gebrůdern baiden ald von iro aintwederam ald von iro erbun, ob sú enwa^erint, gantzlich ermant werdent, daz [dann]^a) daz pfand der vorgescribenun lúte mit allen obgenanden rehten vnd nútzen gar vnd gantzlich ledig ist vnd sin sol denan obgenanden Gieln gebrůdern vnd iro erbun ane allen fúrzug vnd ane alle wider rede. Vnd ze merer sicherhait aller vorgescribener ding henken wir v´nser insigel an disen brief. Wir V^olrich vnd Hainrichwalther die vorgescriben Giel gebrůder veriehint offenlich an disem brief ainer gantzun warhait aller der ding vnd bedingde, so der vorgenande êrwirdiger v´nser gena^ediger herre abt Herman dez gotzhus ze sant Gallen von v´ns an disem brief veriehen het, vnd ze ainem waren offenn vrkúnde der selbun dinge vnd bedingde henken wir v´nserú insigel och an disen brief. Dis geschach vnd wart dirre brief geben ze sant Gallen in der stat, an dem na^ehsten samstag nach sant Walpurg tag ze inga^endem mayen, in dem jar, do man zalte von gottes gebúrt drútzehenhundert jar, dar nach in dem siben vnd vierzigosten jare.

Source Fulltext: Chartularium Sangallense VI, Nr. 4026, S. 545-546.