Wir der schulhaiß vnd der rat ze Vilingen¹ tuon kunt vnd veriehen offenlich an disem brief allen den, die in ansehent oder ho^erent lesen, daz fu^er vns kament die ersamen lu^et swester Sophya von Wurmlingen², bruoder Sifrit, her Cuonrat lu^etpriester ze Gebißdorf³ vnd Bertholdus von Wurmlingen alle drie gebru^eder, vnd veriahent offenlich vor vns, daz su^e von dem erwirdigen herren abt Herman⁴ von gottes gnaden abt vnd dem conuent gemainlich deß gotzhus ze sant Gallen den portzehende ze Emmingen⁵ vor dem Wald⁶ enphangen hetten ze ainem lipdinge, daz su^e den haben vnd messen so^elten alle diewil vnd su^e leptint, mit solchem geding, daz su^e vieru^e ald welhu^e vnder inen lebent aller ia^erlichen in den na^ehsten aht tagen nah sant Gallen tage ain malter vesan vnd ain malter habern⁷ vnsers messes ze Vilingen ze zinß geben vnnd antwurten su^ellen in vnser stat ze Vilingen ainem portner deß gotzhus ze sant Gallen, welher den portner ist, ald sinen gewissen botten, ze einem vrku^ende deß vorgeschribenen lipdinges. Vnnd wenne die vorgenanten vier personen ersturbent, so sol der vorgenempt zehend mit allen rehten dem vorgenempten gotzhus ledig sin. Vnd ze ainem waren vrku^ende der vor geschribenen dinge so haben wir vnser stat insigel gehenket an disen brief. Wir die vorgenempte swester Sophya, bruoder Sifrit, her Cuonrat vnnd Bertholdus von Wurmlingen veriehen offenlich an disem brief ainer gantzer warhait der vorgeschribnen dinge. Vnd deß zuo ainer sta^eter sicherhait so hat her Cuonrat lu^etpriester ze Gebißdorf dauor genempt sin insigel durch vnser bett willen fu^er sich vnd fu^er vns gehenket an disen brief, won wir aigen insigel nit hatten. Dirre brief wart gegeben ze Vilingen an sant Katherinen abent.

Source Fulltext: Chartularium Sangallense VII, Nr. 4651, S. 476-477.