Allen, die disen brief sehent lesent oder ho^erent lesen, kúnde ich Albreht von Haidelberg¹ ritter vnd vergich || des offenlich an disem brief fúr mich vnd alle min erben, das ich mit gůter vorbetrahtung kam fúr den || erwirdigen minen gena^edigen herren von gottes gnaden abt Herman abt des gotzhus ze sant Gallen² vnd || gab im in sin hant frilich vnd willeklich uf Ru^edin, den man nemmet Klainbrot, der min lehen was von dem gotzhus ze sant Gallen, also das er hinnenhin an das vorgeschriben gotzhus ze sant Gallen geho^eren vnd des aigen sin sol, vnd das ich noch min erben dekain recht von lehenschaft noch von aigenschaft niemer me haben noch gewinnen sont zů dem selben Ru^edin an gaistlichem noch an weltlichem gericht noch ân gericht, vnd han darumb von dem egenemten Ru^edin emphangen vnd genomen zehen phunt phenning gůter Costentzer múnse, der ich gantzelich von im gewert bin vnd an minen offen nutz bekert han. Vnd ze ainer gantzer warhait vnd sta^eter sicherhait der vorgeschriben dinge so henk ich min insigel an disen brief fúr mich vnd alle min erben. Der geben wart ze sant Gallen an dem na^ehsten fritag vor sant Hylarien tag in dem jar, do man zalt von gottes gebúrt drúzehenhundert jar vnd darnach in dem ahtoden vnd vierzigosten jar.

Source Fulltext: Chartularium Sangallense VII, Nr. 4064, S. 1.