Ich graf Fridrich von Toggenburg¹ kúnd allen den, die disen brieff sehent oder ho^errent lesen, das fúr mich kam Albrecht von Huggenmatt² min amptman vnd tet mir kunt, das die lieben in gott der abt vnd der conuent des klosters zů Rúti³ des Ordens von Premonstry in Cost(entzer) bystum vordrung vnd ansprach hatten ze dem minren^a) Heinrich Greter von Eschibach⁴ vmb ein gůt, das heisset des Kesslers^b) gůt, vnd vmb ir zins vnd gúlt, der er ein teil verjach vnd ein teil lougnet, vnd ward diser krieg vnderstanden also, das bescheiden lút dar vnder giengen vnd sy mit lieb berichten mit disen nachgeschribnen gedingen, das der vorgenant Heinrich Greter vnd Katherina sin eliche wirtin vnd sine elichen kind vff geben vnd sich entzigen gegen dem abt vnd dem conuent ze ir closters wegen des gůtz, das da heisset des Kesslers^b) gůt, mit aller der eigenschafft vnd rechtung, so sy daran hatten oder wänden han, vnd aller ander gu^eter, die der obgenant Heinrich Greter von dem vorgenanten abt vnd gotzhus ze Rúti ze buwlehen hatt, darumb si im ab gelassen hand alle zins vnd gúlt, die der selb Heinrich Greter inen schuldig was, vnd hat der selb abt im darzů geben zwey pfund dn. Zúricher múntz, der er alklich gewert ist vnd in sin nutz gekert hat, vnd hat der dikgenant Heinrich Greter vnd Katherina sin eliche wirtin, Joh. Heinr. vnd Cůnrat sin elichen sún vnd Mechth. sin eliche tochter sich verzigen mit siner hand vnd verzihend sich ouch an disem brieff aller der rechtung vnd eigenschafft, so si hatten oder wanden han an dem vorgenanten gůt, vnd aller der lehen, so si hatten von dem vorgenanten abt vnd gotzhus ze Rúti gegen dem selben abt vnd gotzhus, als si sin notdurfftig waren vnd gericht vnd vrtel gab, do der vorgenant Albrecht von Huggenmatt von minen wegen offenlich ze gericht sas, vnd hat der egenant Heinr. Greter vnd sin wirtin vnd sini kind die vorgenanten geschworn an heilgen, das vorgenant gůt vnd die lehen niemer mer an ze sprechen an geistlichen noch an weltlichen gerichten noch ân gerichte. Vnd ze offem vrkúnd vnd besta^etung aller diser vorgeschriben dingen so gib ich den vorgenanten geistlichen lúten dem abt vnd dem gotzhus vnd conuent ze Rúti nach Heinrich Greters vnd siner wirtin vnd siner kinden der dikgenanten bette disen brieff besigelt offenlich mit minem insigel. Der geben wart ze Vtznach⁵ in der statt, do von gottes gebúrt waren M CCC XLVIII jar, an dem nechsten donstag^c) nach sant Hylarien tag.

Source Fulltext: Chartularium Sangallense VII, Nr. 4066, S. 2-3.